Թուրքական Sabah թերթի փոխանցմամբ՝ Թուրքիայի փոխվարչապետ և կառավարության խոսնակ Նուման Քուրթուլմուշը հույս է հայտնել, որ շուտով կկարգավորվեն Ռուսաստանի ու Թուրքիայի միջև հարաբերությունները:
«Ռուսական ինքնաթիռը միտումնավոր չեն կործանել: Ի սկզբանե մեր նախագահը հայտարարել է, որ մենք չենք իմացել, թե ում է պատկանել ինքնաթիռը: Ո՛չ Թուրքիան կարող է հրաժարվել Ռուսաստանից, ո՛չ էլ Ռուսաստանը՝ Թուրքիայից:
Կարգավորման համար շատ կարևոր է, որ հարևան երկու երկրներն ունեն բավական խորը հարաբերություններ: Հուսով եմ, որ մեր նախագահի ու մեր վարչապետի նամակներ ուղարկելը կարևոր քայլ է կարգավորման այս գործընթացում: Հուսով եմ, որ Ռուսաստանից կստացվեն դրական ազդանշաններ այդ կապակցությամբ»,- ասել է նա:
Հիշեցնենք, որ սրանից առաջ հաղորդվել էր, որ Թուրքիայի նախագահ Ռեջեփ Էրդողանը նամակ է հղել Ռուսաստանի նախագահ Վլադիմիր Պուտինին՝ շնորհավորելով Ռուսաստանի օրվա կապակցությամբ: Ընդգծվել է, որ դա նմանատիպ առաջին դեպքն է 2015 թվականի նոյեմբերի 24-ին թուրքական օդուժի կողմից ռուսական մարտական ինքնաթիռ խոցելուց հետո:
Թուրքիայի վարչապետ Բինալի Յըլդըրըմն իր հերթին շնորհավորական նամակ է հղել Ռուսաստանի վարչապետ Դմիտրի Մեդվեդևին: Դրանից առաջ էլ պաշտոնանկ է արվել նաև Ռուսաստանում Թուրքիայի դեսպան Ումիթ Յարդըմը:
Նրա տեղում նշանակվել է Բրազիլիայում Թուրքիայի դեսպան Հուսեին Լազիպ Դիրիյոզը, որը համարվում է Մերձավոր Արևելքի հարցերով մասնագետ և եղել է Թուրքիայի 11-րդ նախագահ Աբդուլլահ Գյուլի գլխավոր խորհրդականը:
2010 թվականին Դիրիյոզը դարձել էր ՆԱՏՕ-ի գլխավոր քարտուղարի՝ պաշտպանական ու պլանավորման քաղաքականության հարցերով տեղակալ՝ դառնալով այդ պաշտոնում նշանակված առաջին թուրքը:
Դիրիյոզը ՆԱՏՕ-ի գլխավոր քարտուղարի տեղակալի պաշտոնին հրաժեշտ էր տվել 2013 թվականին և նույն թվականին նշանակվել էր Բրազիլիայում Թուրքիայի դեսպան:
