Երևանի քաղաքապետ, Երևանի շախմատի ֆեդերացիայի նախագահ Տարոն Մարգարյանը Հայաստանի շախմատի ֆեդերացիայի նախագահի առաջին տեղակալ Սմբատ Լպուտյանի, Շախմատի եվրոպայի վետերանների 16-րդ առաջնության մասնակիցների հետ միասին մասնակցել է մայրաքաղաքի հերթական նորաստեղծ շախմատի մանկապատանեկան մարզադպրոցի հանդիսավոր բացման արարողությանը:
Նուբարաշեն վարչական շրջանի շախմատասեր փոքրիկների համար ապահովվել են բոլոր պայմանները: Նորաստեղծ դպրոցն ունի անհրաժեշտ կահույքով և պարագաներով կահավորված դասասենյակներ, նաև ապահովված է սանհանգույցով:
Պատասխանատուների ուղեկցությամբ քաղաքապետ Տարոն Մարգարյանը շրջել է նորաբաց դպրոցում, ծանոթացել երեխաների համար ստեղծված պայմաններին: Պատասխանատուները նշել են, որ նորաբաց շախմատի դպրոցն արդեն իսկ ունի 9 խումբ՝ ավելի քան 130 սաներով:
Իրենց գոհունակությունը փոխանցելով քաղաքապետին՝ շախմատի զարգացման նկատմամբ ցուցաբերած ուշադրության համար, նաև առանձնակի կարևորելով հատկապես շախմատի դպրոցների անվճար գործելու հանգամանքը, պատասխանատուները նկատել են, որ մարզական այս օջախների ստեղծումով մայրաքաղաքում զգալիորեն ավելացել է շախմատասեր մանուկների և պատանիների թիվը:
Հարկ է նշել, որ այժմ ընթացքում են Քանաքեռ-Զեյթուն և Նորք-Մարաշ վարաչական շրջանների շախմատի դպրոցների շինարարական աշխատանքները, որի ավարտից հետո Երևանի բոլոր 12 վարչական շրջաններն ամբողջությամբ ապահովված կլինեն շախմատի հարմարավետ դպրոցներով:
