Հունիսի մեկին ավարտվեց բուհ ընդունվողների հայտագրման առաջին փուլը։ Երկրորդ փուլը, որը նախատեսված է երկքաղաքացիություն ունեցող, բանակից զորակոչված և արտասահմանից եկած դիմորդների համար, կտևի այս ամսվա 24-ից մինչև հուլիսի 2-ը:
ԵՊՀ ընդունող հանձնաժողովի պատասխանատու քարտուղար Վաչագան Գալստյանն այսօր հրավիրված ասուլիսում ասաց, որ ԵՊՀ դիմողների թիվը նվազել է` անցյալ տարվա 5410 դիմորդի փոխարեն այս տարի 3971 հայտ է ընդունվել:
Այս տարի ԵՊՀ-ում բնագիտական ֆակուլտետները կունենան թափուր տեղեր, և ինչպես նշեց Վ. Գալստյանը, հնարավոր է` հայտարարվի թափուր տեղերի մրցույթ:
Ասուլիսի մյուս բանախոսը՝ ԵՊԲՀ ընդունող հանձնաժողովի պատասխանատու քարտուղար Կոնստանտին Մանուկյանը, խոսելով բժշկական համալսարան ընդունվողների թվի մասին, ասաց, որ բուհը դիմորդների կորուստ գրեթե չունի, թիվը պակասել է ընդամենը 90-ով. «Բժշկական համալսարանի դիմորդների թիվը փոփոխության չի ենթարկվում, այս տարի ունենք 1031 դիմորդ: Նշեմ, որ մեզանում վարձերի թանկացում ևս չի եղել` չնայած որ բժշկական կրթությունը շատ թանկ արժե»:
Մ. Խորենացու անվան համալսարանի ռեկտոր Արթուր Աղաբաբյանն էլ խոսեց մասնավոր բուհերի ընդունելությունից՝ նշելով, որ արդեն երրորդ տարին է, ինչ իրենց համալսարանն ընդունելությունը կազմակերպում է միասնական թեստերի միջոցով: Նա կողմ է այն տեսակետին, որ բուհերի ընդունելությունը պետք է հեշտացվի, ուսուցման գործընթացը և ելքը դժվարացվի. «Բուհի ավարտական քննությունները պետք է անցկացնել հանրապետական անկախ հանձնաժողովի միջոցով: Բոլոր բուհերի ուսանողները պետք է մի վայրում հանձնեն քննություն, որպեսզի իրենց ստացած գիտելիքների գնահատականն օբյեկտիվ դրվի»:
Նշենք, որ այ տարի բուհ ընդունվողների զգալի մասը 1995-1996 թվականներին ծնված երեխաներն են: Այս տարի ՀՀ բուհեր դիմել է 12747 դիմորդ, անցյալ տարի այդ թիվը եղել է 16870։
Լուսանկարը՝ Armenpress-ի
