ԱՄՆ նախագահ Բարաք Օբամայի առաջարկը՝ կրճատել ամերիկյան և ռուսական միջուկային զինանոցը, անժամանակ է և կարող է ընկալվել որպես թուլություն: Այսպես են կարծում ընդդիմադիր Հանրապետական կուսակցության անդամները:
Հիշեցնենք. Օբաման Բեռլինում հայտարարել է, որ Վաշինգտոնը մտադիր է Մոսկվայի հետ բանակցություններ անցկացնել՝ միջուկային զինանոցը 1/3-ով կրճատելու մասին: Օբաման նաև կողմ է Եվրոպայում ամերիկյան և ռուսական զենքի կրճատման ռազմավարությանը:
«Փորձը ցույց է տալիս, որ այլ երկրների միջուկային պոտենցիալը ևս աճում է: Ռուսաստանը յուրաքանչյուր փուլում մեզ մարտահրավեր է նետում, Իրանի և ԿԺԴՀ-ի միջուկային հավակնությունները վերանում են: Այժմ միջուկային զենքի հետագա կրճատումների ժամանակը չէ»,- ասել է Օկլահոմայի հանրապետական սենատոր Ջիմ Ինհոֆը:
Սենատոր Այոթի կարծիքով՝ «նախագահ Օբամայի՝ միջուկային զինանոցի նվազեցման ձգտումը սխալ է և վտանգավոր: Այն, ինչը Օբաման փոխզիջում է համարում, Պուտինը դիտարկում է որպես թուլություն»:
«Նախագահը պետք է իր ռուս գործընկերոջը հասկացնի, որ Միացյալ Նահանգները թույլ չի տա վախեցնել իրեն կամ իր դաշնակիցներին, թույլ չի տա անտեսել ռազմական ոլորտում վերահսկողության պարտավորությունները»,- ասել է կոնգրեսական Բաք Մաքեոնը:
