Ըստ երևույթին առաջիկայում բավական ծանր օրեր են սպասվում ոստիկանության բարձրաստիճան շատ պաշտոնյաների, նախկին և ներկա, ովքեր որևէ դերակատարում են ունեցել մարտի 1-ի իրադարձություններում: Դատելով Մեդիամաքսին Ռոբերտ Քոչարյանի տված հարցազրույցից՝ նա Սերժ Սարգսյանին առաջարկում է մարտի 1-ի գործով բացահայտումներ կատարել անմիջական կատարողների մասով՝ դրանով փակելով թեման:
«Խնդիրն այն է, որ հետաքննությանը չի հաջողվում բացահայտել մարդկանց մահվան բոլոր հանգամանքները` կոնկրետ անձերին պատասխանատվության կանչելու կամ ինքնապաշտպանության շարժառիթներով նրանց արդարացնելու համար: Այս հանգամանքն, իհարկե, խոցելի է դարձնում իշխանությունների դիրքերը ինչպես հանրության, այնպես էլ միջազգային կազմակերպությունների աչքերում: Ենթադրում եմ՝ դրանով են բացատրվում նախագահի նշված հանձնարարականները: Հետաքննության կոնկրետ արդյունքները կկասեցնեին թեմայի բազմապիսի շահարկումները, ինչում ես խիստ շահագրգռված եմ»: Սա հատված է Քոչարյանի հարցազրույցից:
Ակնհայտ է նրա առաջարկը Սերժ Սարգսյանին` բացահայտել մի քանի կոնկրետ կատարողների, և գուցե նաև նրանց անմիջական հրամանատարների, ու այդպիսով փորձել, հանդարտեցնել կրքերը: Այլ կերպ ասած, մինիմում մի ծրագիր, որով պատասխանատվությունից զերծ կմնա այսպես ասած բարձրագույն իշխանությունը: Շատ հավանական է, որ Սերժ Սարգսյանը կընդունի նրա այդ առաջարկը, եթե իհարկե չկարողանա մարտի 1-ի մասին իր հայտնի հայտարարությունները պահել զուտ խոսքի շրջանակում և ստիպված լինի ինչ որ մասով գոնե անցնել գործի: Իսկ դա նշանակում է, որ իրավապահ համակարգից ընտրվելու են կոնկետ թիրախներ, ընդ որում՝ ոչ միայն անմիջական կատարողների, այլև, թերևս, որոշակի բարձրաստիճանների, քանի որ տեսարանը լիարժեք կստացվի միայն այդ դեպքում:
Ո՞վ է հայտնվելու քավության նոխազի դերում, ոստիկանության բարձրաստիճան ո՞ր մի պաշտոնյան: Ո՞ւմ է ավելի «թանկ» գնահատելու իշխանությունը: Իսկ գուցե նրան, ով ինքն իրեն ամենից «էժանը» կգնահատի:
Բոլոր դեպքերում, իրավապահ համակարգը կարծես թե հայտնվել է այսպես ասած «ռուսական ռուլետկայի» կարգավիճակում և սպասում է, թե ումով է «կրակելու» իշխանությունը, ով է հայտնվելու այդ «միակ փամփուշտի» դերում: Ըստ երևույթին, քավության ապագա նոխազին կտրվեն որոշակի անվտանգության և բարեկեցության երաշխիքներ։ Կարող են և չտրվել: Միևնույն է, ի՞նչ կարող է անել այդ նոխազը: Չէ՞ որ հենց ինքն է իր գործի բերումով տեսել, թե ինչի է ընդունակ Հայաստանի իշխող վարչակարգը, երբ խոսքն իշխանության պահպանման մասին է: Ընդ որում, դա լավ դաս կլինի մյուս իրավապահների համար, ովքեր համոզված են, թե կատարելով իշխանության հրամանները, իշխանությունից միայն երախտիքի խոսքեր են լսելու: Ամենևի՛ն: Գալիս է քավության նոխազ դառնալու ժամանակը, երբ դասեր քաղելու ժամանակը ճիշտ չես օգտագործում: