«Պուտին կոչվածը պետք է հասկանա՝ ինչքան Ադրբեջանն ուժեղանա, այնքան ավելի կհեռանա ՌԴ-ից». ՀԽ-ում քննարկել են պատերազմի և խաղաղության հարցերը

Մայիսի 4-ին հանրապետության նախագահ Սերժ Սարգսյանը հանդիպել էր Հանրային խորհրդի անդամների հետ, ներկայացրել ղարաբաղա-ադրբեջանական շփման գծում տիրող իրավիճակը և հակամարտության կարգավորման հնարավորությունը։

Հանդիպումից հետո Հանրային խորհրդի անդամները մի քանի անգամ քննարկումներ են ունեցել։ Երևանի պետական համալսարանի պատմության ֆակուլտետի դեկան, Հանրային խորհրդի անդամ Էդիկ Մինասյանն ասում է՝ որոշ հարցերում կան տարաձայնություններ։ Խորհրդի անդամներից ոմանք գտնում են, որ բանակցությունների գնալն անիմաստ է, ոմանք էլ կարծում են վատ բանակցությունը պատերազմից նախընտրելի է։ Կան իրարամերժ կարծիքներ նաև 800 հեկտար հողատարածքը հետ բերելու հարցում։

Հանրային խորհրդի անդամ Արշակ Սադոյանի խոսքերով էլ՝ այժմ բարդ իրավիճակում ենք, և հույսը միայն մեր մարտական ոգու վրա դնելը քիչ է։ Ըստ նրա, սակայն, այս ապրիլյան քառօրյա պատերազմից հետո իշխանավորների, օլիգարխների ճնշող մեծամասնությունը հասկացավ՝ եթե պատերազմում պարտվենք, ամենաշատը իրենք են կորցնելու

Էդիկ Մինասյանը հավելեց, որ ոմանք առաջարկել են մեծահարուստներին առաջարկել, որպեսզի գումար հատկացնեն բանակին:

Արշակ Սադոյանի կարծիքով՝ քաղած դասերից մեկը պետք է լիներ հասկանալ վերջապես, որ այսօր պատերազմ պետք չէ ո՛չ Հայաստանին, ո՛չ Ադրբեջանին, պատերազմի հիմնական շահառուն Ռուսաստանն է, և մենք այս առումով պետք է վերանայումներ անենք։