Հյուսիսային Կորեայի առաջնորդ Կիմ Չեն Ինի մորաքույրը The Washington Post պարբերականին առաջին անգամ հարցազրույց է տվել Հյուսիսային Կորեայում իր կյանքի մասին:
Կո Յոն Սուկը 60 տարեկան է: Նա ԱՄՆ է եկել 1998 թվականին ամուսնու և 3 երեխաների հետ: Սակայն նույնիսկ երկրից հեռանալուց 18 տարի անց ընտանիքը մնում է Հյուսիսային Կորեայի մասին «արժեքավոր տեղեկատվության աղբյուր»:
Կո Յեն Սուկի խոսքով` հյուսիսկորեական առաջնորդը ծնվել է 1984 թվականին` իր ավագ որդու հետ նույն ժամանակ: Մորաքույրը խնամել է նրան, երբ նա սովորել է Շվեյցարիայի դպրոցում: Նա Շվեյցարիա է ժամանել 12 տարեկանում:
«Մենք ապրել ենք նորմալ տանը և եղել ենք նորմալ ընտանիք: Ես նրանց համար (Կիմ Չեն Ինի և նրա ավագ եղբայր Կիմ Չեն Չխոլիի) եղել եմ ինչպես մայր: Ես աջակցել եմ նրան, որ նա տուն բերի ընկերներին, քանի որ մենք ուզում էինք, որ նրանք ապրեն նորմալ կյանքով: Ես երեխաների համար ուտելիք էի պատրաստում: Նրանք տորթեր էին ուտում և Լեգո խաղում»,- ասել է Կո Յեն Սուկը:
Մորաքույրը պատմել է, որ զարմիկների հետ այցելել է Փարիզի Դիսնեյլենդը, Կիմ Չեն Ինը Ալպերում դահուկներ է քշել, հանգստացել է ֆրանսիական Ռիվերայում և հաճախել է իտալական ռեստորաններ: Դպրոցում սկսել է բասկետբոլ խաղալ և պաշտել է Մայքլ Ջորդանին: Իսկ ամառները սիրել է տուն մեկնել:
Մորաքրոջ խոսքով` նա անբան չի եղել, սակայն բռնկվող էր, նա համբերություն չի ունեցել: Երբ մայրը նրան դիտողություն է արել քիչ սովորելու համար, նա հացադուլ է հայտարարել:
Կիմ Չեն Ինին դաստիարակել են այնպես, որ նա իմացել է՝ ինչ-որ ժամանակ դառնալու է առաջնորդ: Նրա 8-ամյակի տոնին եկել են բարձրագույն ռազմական հրամանատարներ և խոնարհվել նրա առաջ, որից հետո մշտապես նրան հարգանք են արտահայտել, գրում է WP` հղումով Կո Յեն Սուկին:
