Տուրիզմի հայկական ինստիտուտի ռեկտոր, տուրիզմի փորձագետ Ռոբերտ Մինասյանի փոխանցմամբ` տուրիզմը սոսկ այցելություն չէ, այն բիզնես է, աշխատատեղեր, երկրի բարեկեցություն. «Մեկ տուրիստը երբ այցելում է երկիր, երեքից չորս աշխատատեղ է ստեղծվում: Այսօր չկան երկրներ, որ իրենց ամբողջ ներուժը չներդնեն տուրիզմից շահույթ ստանալու համար»,- ասաց նա` լրագրողների հետ հանդիպմանը:
Նա նշեց, որ դեռևս 2003 թվականին Հայաստանը զբոսաշրջությունն ընդունել է որպես գերակա ուղղություն, սակայն մեզանում դրա զարգացման համար դեռևս բավարար քայլեր չեն արվում. «Տուրիզմն առանց նորության չի կարող լինել, տուրիստական ռեսուրսի կադաստր է պետք, պիտի ըստ մարզերի նորից ուսումնասիրություններ անել: Մենք մեր ռեսուրսների չնչին քանակն ենք օգտագործում, այստեղ ամենակարևոր դերը մարդն է, քիչ են այն մարդիկ, ովքեր կարող են տուրիզմ զարգացնել, դրա համար կադրային ուսուցում է պետք»:
Բանախոսն ասաց, որ անցյալ տարի 840 հազար զբոսաշրջիկ է այցելել Հայաստան, որտեղ պլանավորված` այսինքն տուր-ընկերությունների միջոցով կազմակերպված տուրիզմի մակարդակը բավականին ցածր է եղել:
Նա ասաց նաև, որ ներսում զբոսաշրջության զարգացմանը պետք է խթանեն նաև հիմնարկ-ձեռնարկությունների տնօրենները, ովքեր պիտի կազմակերպեն իրենց աշխատողների հանգիստը:
