Նավթի համաշխարհային գները հինգշաբթի շարունակում են աճել ԱՄՆ էներգետիկայի նախարարության՝ երկրում նավթի պահուստների նվազման մասին տվյալներից հետո: WTI տեսակի նավթը 2015թ. հոկտեմբերի 12-ից ի վեր առաջին անգամ մեկ բարելի դիմաց գերազանցել է 50 դոլարը: Այս մասին հայտնում է RIA Novosti-ն՝ վկայակոչելով առևտրի տվյալները:
Երևանի ժամանակով ժամը 15.48-ի դրությամբ Brent տեսակի նավթի հուլիսյան մատակարարումների ֆյուչերսային գործարքների գինն աճել է 1,21%-ով՝ մեկ բարելի դիմաց մինչև 50,34 դոլար: WTI տեսակի նավթի հուլիսյան ֆյուչերսների գինը աճել է 1,05%-ով՝ մեկ բարելի դիմաց մինչև 50,08 դոլար:
ԱՄՆ էներգետիկայի նախարարության չորեքշաբթի հրապարակած զեկույցի համաձայն՝ երկրում նավթի կոմերցիոն պահուստները (բացառելով ռազմավարական պահուստը) մայիսի 20-ին ավարտված 1 շաբաթում զգալիորեն նվազել են 4,2 մլն բարելով՝ մինչև 537,1 մլն բարել:
Բացի դրանից՝ նավթի արդյունահանումն ԱՄՆ-ում մեկ շաբաթում կրճատվել է՝ օրական 24 000 բարելից մինչև օրական 8,767 մլն բարել:
