Նախկին ՀՀՇ վարչության անդամ Երջանիկ Աբգարյանի կարծիքով՝ իրանական գազից չօգտվելու թիվ մեկ պատճառն այն է, որ Հայաստանի իշխանությունների վերևներում նստած են ռուսական գործակալներ, որոնք Ռուսաստանի շահերից բացի, ուրիշ ոչինչ չեն պաշտպանում: «Առաջին լրատվական»-ի հետ զրույցում Աբգարյանը կարծիք հայտնեց, որ այդ մարդիկ չեն ղեկավարում Հայաստանի պետական ազգային շահերը՝ ունեն բոլոր հնարավորություններն այլընտրանքային, ավելի էժան գազ ներմուծելու համար, սակայն չեն անում:
Մեր զրուցակիցն անդրադարձավ նաև օրեր առաջ էներգետիկայի նախարար Արմեն Մովսիսյանի արած հայտարարություններին և ասաց․ «Էներգետիկայի նախարարը նույնիսկ չի հասկանում, թե ինչ է խոսում: Նա չի հիշում գազի գնի պայմանագրի ստորագրման ժամանակը։ Չեմ հասկանում՝ նման կարևոր իրադարձություն չիմանալով՝ նա էլ ինչպե՞ս է նախարար»:
Աբգարյանը վստահ է, որ այս ամենը առք ու վաճառք է, առևտուր և գործողություններին այլ ընթացք տալու դեպքում կարելի է լավ արդյունքի հասնել. «Իրանը Թուրքիային գազը վաճառում է 335 դոլար/1000 խմ գնով. դա առևտուր է։ Կարող է Հայաստանին էլ 335-ով ծախել, կարող է նույնիսկ 100 ով ծախել, այստեղ հազար ու մի հարց կա, որը հուշում է, որ կարելի է առևտուրը այլ հիմքերի վրա իրականացնել, այսինքն Հայաստանի համար ավելի էժան գազ վերցնելու հնարավորություն կարող է առաջանալ»։
Մեր դիտարկմանը, թե ժամանակին երկրորդ նախագահ Ռոբերտ Քոչարյանն իրանական գազի խողովակները հանձնել էր Ռուսաստանին, Երջանիկ Աբգարյանը պատասխանեց. «Ռոբերտ Քոչարյանը հանցագործություն է կատարել, երբ խոողովակի տրամագիծը 700 միլիմետրանոց դարձրեց՝ ավելի մեծ պետք է լիներ, որը նաև պետք է կարողանար ապահովել Հայաստանի ապագայի զարգացումները, ինչպես նաև հնարավորության դեպքում գազը Վրաստանով արտահանվեր դեպի Եվրոպա՝ այսինքն որպես տրանզիտ նաև կծառայեր։ Եվ հիմա առաջացող այս խնդիրն իրականում Քոչարյանից է գալիս: Հիմա եթե ասենք՝ սա է դրությունը… այնուամենայնիվ մեր Սահմանադրությունը մեզ հուշում է, որ մենք ինքնիշխան երկիր ենք, մեր իշխանությունը տարածվում է ամբողջ Հայաստանի տարածքի վրա. սա Սահմանադրության 2-րդ հոդվածով ամրագրված է, և մենք հիմնվելով այդ հիմքի վրա՝ պարտավոր ենք պարտադրել «Գազպրոմին», որպեսզի գազն այլևս մատակարարի Իրանից, որն ավելի էժան կլինի, մեկ երրորդի չափով ավելի էժան կլինի: Այնպես որ, այստեղ այլ հարց չկա, Հայաստանը պետք է ցույց տա, որ ինքն իշխանություն ունի, որն իր ժողովրդի շահերով է ղեկավարվում և ոչ թե՝ գազպրոմների, Ռուսաստանի և այլոց»: