Իրանի նախագահական ընտրություններում բարեփոխիչների թևի ներկայացուցիչ ու միջուկային խնդրով նախկին բանակցող Հասան Ռուհանիի հավանական հաղթանակը կարող է ամրապնդել երկրի դիրքն աշխարհում` նպաստելով մի շարք պատժամիջոցներ հանելուն և Վաշինգտոնի հետ հարաբերությունները ջերմացնելուն, RIA Novosti-ին հայտնել են ԱՄՆ-ում Իրանի հարցով փորձագետները:
«Եթե նա նախագահ ընտրվի, ու եթե հատկապես ստանա ընտրողներից ակնհայտ մանդատ, ապա Ռուհանիից հարկ է սպասել փոփոխություններ միջուկային ծրագրում և Իրանի արտաքին քաղաքականության որոշ հարցերում, ու ես կարծում եմ, նա դա կանի: Թեև Իրանի միջուկային քաղաքականությունը վերջնական արդյունքում որոշում է Իրանի հոգևոր առաջնորդ Ալի Խամենեին, Ռուհանիի հաղթանակը ծանրակշիռ ազդեցություն կունենա քաղաքականության այդ ոլորտների վրա»,- ասել է Մոհսեն Միլանին՝ Հարավային Ֆլորիդայի համալսարանի ռազմավարական ու դիվանագիտական հետազոտությունների գործադիր տնօրենը:
