Business Грузия-ի փոխանցմամբ, Եվրախորհրդարանի պատգամավորները միաձայն հավանության են արժանացրել Վրաստանին 46 միլիոն եվրո ֆինանսական օգնություն ցուցաբերելու փաթեթը: Համապատասխան բանաձևի քվեարկությունը կայացել է այսօր Ստրասբուրգում ընթացող ԵԽ բարձրագույն օրենսդիր մարմնի նստաշրջանի շրջանակներում:
ԵՄ օգնությունը նախատեսված է Վրաստանում տնտեսական աճի գրանցման, գործազրկության մակարդակի նվազման, ինչպես նաև արտահանման խթանման համար:
Բացի այդ, փաստաթղթի հեղինակները հուսով են, որ այսպիսի միջոցները հնարավորություն են ընձեռում տնտեսության ֆինանսական հատվածում հաջող բարեփոխումներ իրականացնելու և ներդրումների հարցում երկրի գրավչությունն ավելացնելու համար:
Վերոնշյալ գումարի կեսը հատկացվելու է դրամաշնորհների, իսկ մյուս կեսը` փոխառությունների միջոցով:
Եվրախորհրդարանը վրացական իշխանություններին կոչ է արել խստորեն պահպանել Արժույթի միջազգային հիմնադրամի (ԱՄՀ) առջև ստանձնած պարտավորությունները:
Հիշեցնենք, որ մեկ ամիս առաջ էլ նշվում էր, թե ԱՄՆ-ը այս տարի Վրաստանին հատկացնելու է 87 միլիոն դոլար, ինչը հիմնականում ուղղվելու է ժողովրդավարական բարեփոխումներին: