Արամ Խաչատրյանի անվան միջազգային մրցույթի հաղթողը ռումինացի Անդրեյ Իոնիցան է (լուսանկարներ)

Այսօր «Արամ Խաչատրյան» համերգասրահում տեղի ունեցավ Արամ Խաչատրյանի անվան 9-րդ միջազգային մրցույթի փակման հանդիսավոր արարողությունը:

Թավջութակահարների մրցույթը մեկնարկել էր մեծ կոմպոզիտորի ծննդյան օրը՝ հունիսի 6-ին ու անցկացվել 3 փուլով:

Ժյուրին, որի անդամներն էին Անյա Լեխները (Գերմանիա), Օլե Ակահոշին (ԱՄՆ/Ճապոնիա), Թիմորա Ռոսլերը (Նիդեռլանդներ/Իսրայել), Քրիստիան Ֆլորեան (Ռումինիան), Ալեքսեյ Սելեզնյովը (Ռուսաստան), Էրկի Լահեսման (Ֆինլանդիա) ու Արամ Թալալյանը (Հայաստան, ժյուրիի նախագահ) ընտրել էին 4 շնորհալի երիտասարդ թավջութակահարների՝ Իոնիցա Անդրեյին (Ռումինիա), Պեռլովա Ալեքսանդրային (Ռուսաստան), Մորոզովա Աննային և Խաչատրյան Գայանեին (Հայաստան):

Եվ այսպես, ժյուրին այս տարի Արամ Խաչատրյանի անվան 9-րդ միջազգային մրցույթի հաղթող ճանաչեց Անդրեյ Իոնիցային (15 հազար դոլար մրցանակ), 2-րդ մրցանակակիր ճանաչվեց Աննա Մորոզովան (10 հազար դոլար), իսկ 3-րդ տեղը կիսեցին Ալեքսանդրա Պեռլովան ու Գայանե Խաչատրյանը (5 հազար դոլար):

Փառատոնի պատվավոր հյուր Քեյթ Մարիա Կոռնելիա Մուխը՝ Midem Classical and Jazz Worlwide փառատոնի տնօրենը (Գերմանիա), հատուկ մրցանակ հանձնեց Անդրեյ Իոնիցային՝ նրան հրավիրելով մասնակցել 2014 թ. փառատոնին: Նա դաշնակահար Արմեն Բաբախանյանին ու Գայանե Խաչատրյանին ևս հրավիրեց մասնակցելու փառատոնին:

Մրցանակ էր սահմանել նաև Երևանի Կոմիտասի անվան պետական կոնսերվատորիան, որի ռեկտոր Շահեն Շահինյանն այն հանձնեց Արթուր Ավանեսովին ու Արմեն Բաբախանյանին: Փառատոնի պատվավոր հյուր, Մոսկվայի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Պավել Կոգանն, իր խոսքում կարևորելով փառատոնի անցկացումը տաղանդավոր երիտասարդների ճանապարհ հարթելու գործում, հայտարարեց, որ հաղթողը՝ Անդրեյ Իոնիցան հնարավորություն ունի հանդես գալ Մոսկվայի պետական սիմֆոնիկ նվագախմբի հետ:

ԱՊՀ անդամ երկրների հումանիտար համագործակցության միջպետական հիմնադրամն էլ իր հերթին մրցանակ շնորհեց Հակոբ Աթյանին ու Միքայել Նավասարդյանին՝ նրանց 2014 թ. հրավիրելով մասնակցել շրջագայութան:

Հայաստանի պետական երիտասարդական նվագախմբի «Հանդիսատեսի համակրանք» մրցանակին արժանացավ Լևոն Առաքելյանը:

Արամ Խաչատրյանի անվան տուն-թանգարանը ևս իր կողմից մրցանակ հանձնեց Արամ Խաչատրյանի անվան 9-րդ միջազգային մրցույթի հաղթողին:

Հիշեցնենք, որ այս տարի Արամ Խաչատրյանի անվան միջազգային մրցույթը նոր կարգավիճակ ուներ՝ փառատոնը մայիսին ընտրվել էր Միջազգային երաժշտական մրցույթների համաշխարհային անդամ: