Վլադիմիր Լենինի հեռագիրը, որը տեղեկացնում է Շվեյցարիայից Ռուսաստան վերադարձի մասին, այսօր կվաճառվի Christie’s աճուրդի տանը, հայտնում է RIA Novosti-ն:
Հեռագիրն ուղարկվել է Բեռնից 1917 թ. ապրիլի 6-ին: Այն ուղղված էր ֆրանսիացի սոցիալիստ Անրի Ժիլբոյին ու ֆրանսերենից թարգմանաբար ասում է. «Մենք վաղը կեսօրին գնում ենք Գերմանիա: (Ֆրից) Պլատենն ուղեկցում է գնացքը: Խնդրում եմ՝ արագ եկ: Ծախսերը մենք կփակենք: Վերցրու հետդ Ռոմեն Ռոլանին, եթե նա համաձայն է: Արեք ամեն ինչ, որ բերեք (Շառլ) Նենին կամ (Էռն-Փոլ) Գրաբերին: Ֆոլքսհաուս: Ուլյանով»:
Իմանալով Ռուսաստանում փետրվարյան հեղափոխության մասին՝ Լենինն անհապաղ սկսել էր կազմակերպել իր վերադարձը Շվեյցարիայից Ռուսաստան:
Պլատենին հաջողվել էր պայմանավորվել Գերմանիայի արտգործնախարարության հետ՝ երկրի տարածքով Լենինին ու մոտ 3 տասնյակ նրա համախոհներին գնացքով Ռուսաստան ուղարկելու մասին: Հեղափոխականների խումբը 1917 թ. ապրիլի 9-ին լքել էր Բեռնը:
Մեկ շաբաթ անց Լենինը ժամանեց Պետրոգրադ, իսկ կես տարի անց տեղի ունեցավ Հոկտեմբերյան հեղափոխությունը:
Ամենայն հավանականությամբ, հեռագիրն այս ամբողջ տարիներին գտնվել է Ժիլբոյի ընտանիքում:
Պատմական փաստաթուղթը գնահատվում է 20-30 հազար ֆունտ սթեռլինգ:
