Յուրաքանչյուր հինգերորդ ամերիկացի այն կարծիքին է, որ Ռուսաստանը լուրջ վտանգ է ներկայացնում Միացյալ Նահանգների համար: Այդ մասին են վկայում սոցիոլոգիական հարցման հրապարակված արդյունքները, որն անցկացրել են CNN հեռուստաալիքը և ORC հետազոտական ծառայությունը։
Հարցման մասնակիցների 21 տոկոսը վստահ է, որ Ռուսաստանը «լուրջ սպառնալիք» է ներկայացնում ԱՄՆ-ի համար, 40 տոկոսն այդ սպառնալիքը համարում է չափավոր, 22 տոկոսը՝ ոչ մեծ: 15 տոկոսն այն կարծիքին է, որ ՌԴ-ի կողմից իրենց երկրի համար ընդհանրապես վտանգ չկա:
Ամերիկացիների առավել մեծ անհանգստությունն է առաջացնում ԴԱԻՇ ահաբեկչական խմբավորումը: Խմբավորման կողմից վտանգի ամենաբարձր աստիճանը նշել է հարցվածների 73 տոկոսը: Չինաստանի, Իրանի և Հյուսիսային Կորեայի կողմից «լուրջ սպառնալիք» է տեսնում հարցման մասնակիցների համապատասխանաբար 24, 43 և 43 տոկոսը:
Հարցումն այս տարվա ապրիլի 28-ից մինչև մայիսի 1-ը հեռախոսով անցկացվել է շուրջ հազար ամերիկացիների շրջանում: Վիճակագրական անճշտությունը կազմում է մոտավորապես 3 տոկոս։
