Երեկ ՆԱՏՕ-ն հերքել է այն մեղադրանքները, համաձայն որի Դաշինքի նավերը չեն օգնում Աֆրիկայից փախստականներով նավերին, եթե դրա անհրաժեշտությունը լինում է: «ՆԱՏՕ-ի նավերի անձնակազմերը ամբողջովին և լիարժեք գիտակցում են իրենց պատասխանատվությունը միջազգային ծովային իրավունքի շրջանակներում», այս գրում է Deutsche Welle-ն` հղում կատարելով ՆԱՏՕ-ի ներկայացուցիչ Կարմեն Ռոմերոյին:
Հիշեցնենք, որ երեկ բրիտանական The Guardian-ը գրել էր, որ Աֆրիկայից Եվրոպա գնացող նավակը, որում եղել է 71 փախստական, այդ թվում` կանայք և մանկահասակ երեխաներ, չի ստացել ՆԱՏՕ-ի նավերի և ուղղաթիռների օգնությունը` չնայած նրանց միջև եղած կոնտակտի: «Ամեն առավոտ մենք արթնանում էինք և հայտնաբերում մի քանի անշունչ մարմին, որոնք ծովն էինք գցում 24 ժամ հետո»,- պատմել է ողջ մնացած 9 փախստականներից մեկը: Նա տեղեկացրել է նաև, որ նավը հաղորդման մեջ է եղել ՆԱՏՕ-ի նավի և ուղղաթիռի հետ:
71 ուղևորով ծովի քմահաճույքին հանձնված նավակում կենդանի են մնացել միայն 9 հոգի:
ՆԱՏՕ-ի ներկայացուցիչը հավելել է, որ այդ պահին Միջերկրական ծովում եղել է միայն մեկ նավ, այն էլ 100 մղոն հեռավորության վրա. «իսկ դրանից ավելի վաղ ՆԱՏՕ-ի երկու նավեր իրարից անկախ փրկել են ավելի քան 500 աֆրիկացու, որոնց նույն ճակատագիրն էր սպասվում»,- նշել է Ռոմերոն: