«Ֆեյսբուք» սոցիալական ցանցում ստեղծվել է «Դեմ ենք բուհերի վարձավճարների թանկացմանը» նախաձեռնություն:
«Առաջին լրատվական»-ի հետ զրույցում նախաձեռնության կազմակերպիչ, ակտիվիստ Անի Նավասարդյանը նշեց, որ իրենք պատրաստվում են հրավիրել իրավաբանների, տնտեսագետների խումբ, և այդ խումբը կպարզի, թե ինչն է պատճառը, որ այսօրվա վարձերը չեն բավականացնում բուհերի խնդիրները լուծելու համար: Նրա խոսքերով՝ այսպես թե այնպես դրանք բավականին բարձր են, և ևս 100․000 դրամով բարձրացնելն անթույլատրելի է. «Բացի այդ իրավական, տնտեսական խնդիներից, ուզում ենք՝ իրենց այդ ասած կրթական բարեփոխումները մեր ուսերի վրա վերցնել և հասականալ, թե իրականում ի՞նչ բարեփոխումներ են պետք՝ և՛ մեզ տրված ինֆորմացիայի առումով, և՛ ուսխորհուրդների հետ կապված, ուսանողների ձայնը լսելի դարձնելու հետ կապված»:
Մեր այն հարցին, թե կհամախմբվի՞ արդյոք ուսանողությունն այս նախաձեռնության շուրջ, Ա. Նավասարդյանը պատասխանեց. «Ուսանողները կհամախմբվեն, եթե կազմակերպված ճիշտ պահանջներ դրվի, իրենց վերաբերող հարց է։ Ինչքան որ ակտիվ լինեն՝ այնքան լավ, այսինքն ամեն ինչ մեզանից է կախված»:
Մեր զրուցակիցը հավելեց, որ նախատեսում են իրականացնել բողոքի ակցիաներ և այլ միջոցառումներ:
