Հունիսի 6-ին Աֆղանստանում ահաբեկիչերի հարձակման զոհ դարձած վրացի յոթ խաղաղապահների դիերն այսօր ԱՄՆ ռազմաօդային ուժերի ինքնաթիռով տեղափոխվել են Թբիլիսի: Նույն օդանավով Վրաստանի մայրաքաղաք է վերադարձել երկրի պաշտպանության նախարար Իրակլի Ալասանիան: Զինծառայողների մահվան հետ կապված՝ նա դադարեցրել էր իր այցը Բրյուսել և ուղևորվել Աֆղանստան՝ Հելմանդ գավառում՝ վրացի խաղաղապահների գտնվելու գոտում իրավիճակի հետ ծանոթանալու համար: Այս մասին հայտնում է ITAR-TASS-ը:
Թբիլիսիի օդանավակայանում զինվորների մարմինները տեղափոխած օդանավը դիմավորել են Վրաստանի նախագահ Միխեիլ Սաակաշվիլին, խորհրդարանի նախագահ Դավիդ Ուսուպաշվիլին, երկրի կառավարության անդամները, ՊՆ և ԶՈՒ Միացյալ շտաբի ղեկավարները և Վրաստանում ԱՄՆ դեսպան Ռիչարդ Նորլանդը:
Ուսուպաշվիլին ասել է, որ 7 խաղաղապահների մահը մեծ կորուստ է Վրաստանի համար, նրանց անուններն ընդմիշտ կմնան ժողովրդի հիշողության մեջ:
Եվրոպական և եվրաատլանտյան կառույցներում ինտեգրման հարցերով պետնախարարԱլեքսի Պետրիաշվիլիի խոսքերով՝ Վրաստանը հետագայում էլ իր արժանի ներդրումը կունենա միջազգային ահաբեկչության դեմ պայքարում՝ իր նպաստը բերելով միջազգային կայունության ու խաղաղության հաստատման գործին:
Վերջին օրերին Վրաստանում սկսվել են քննարկումներ Աֆղանստանից խաղաղապահների դուրս բերման վերաբերյալ: Նման պահանջով շաբաթ օրը Թբիլիսիում երիտասարդական կազմակերպությունների ներկայացուցիչներն ակցիաներ են անցկացրել:
Ընդդիմադիր լեյբորիստական կուսակցությունը կարծում է, որ պետք է այդ հարցով հանրաքվե անցկացնել: Հունիսի 10-ին կուսակցությունը համապատասխան պաշոնական հայց կներկայացնի երկրի ԿԸՀ:
Վրաստանն Աֆղանստանում զինված գործողություններին մասնակցում է 2009 թվականի նոյեմբերից: 3.5 տարում երկիրն այնտեղ տվել է 29 զոհ:
