Այսօր կկայանա Երևանի նորընտիր ավագանու առաջին նիստը: «Առաջին լրատվական»-ի հետ զրույցում այս մասին ասաց «Բարև Երևան» դաշինքի՝ ավագանու անդամ Արթուր Գասպարյանը: Մեր այն հարցին, թե «Բարև Երևան»-ը կմասնակցի՞ արդյոք Տարոն Մարգարյանի երդմնակալության արարողությանը, Ա․ Գասպարյանն ասաց․ «Երդմնակալությունը վաղը չէ, ամսի 10-ին է: Դե, բնականաբար, կքննարկենք, ես դեռ չգիտեմ ինչ դիրքորոշում կունենան ավագանու մնացած անդամները, գիտեմ, որ քննարկում կլինի: Ես ինքս հակված եմ, որպեսզի երդմնակալության արարողությանն, այնուամենյանիվ, մենք մասնակցենք՝ իմ անձնական կարծիքն եմ ասում, բայց մեզ մոտ առայժմ չի քննարկվել մասնակցելու կամ չմասնակցելու հարցը»:
Մեր այն դիտարկմանը, թե իրենք բազմիցս նշել են որ և՛ Սերժ Սարգսյանը, և՛ Տարոն Մարգարյանն ընտրախախտումներով են ընտրվել, սակայն մեկի երդմնակալության արարողությանը չեն մասնակցում, իսկ մյուսինին հակված են մասնակցել, Գասպարյանն պատասխանեց․«Ինստիտուցիոնալ եթե վերցնենք՝ նայենք, մեզ ընդհանրապես չեն էլ հրավիրել Սերժ Սարգսյանի երդման արարողությանը, որպեսզի մենք էլ որոշում կայացնեք՝ գնում ենք Ազատության հրապարակ, թե… Այնտեղ մասակցում էին ԱԺ պատգամավորները, իսկ մեզ չէին էլ հրավիրել: Հետո՝ նա այլ պաշտոն է, սա՝ այլ. սա ավելի շատ գործադիր պաշտոն է, նա մաքսիմալ քաղաքական պաշտոն, քաղաքապետի պաշտոնը մաքիսում 50 տոկոսով է քաղաքական պաշտոն, մնացածը գործադիր է։ Ընդհանրապես շատ սխալ է, իմ կարծիքով, Երևանի քաղաքապետին երդման բերել, կամ այդ ձևական բաները՝ շատ սխալ է: Կարծում եմ՝ քաղաքապետը չպետք է երդում ուտի, ինքը լավ է աշխատելու, թե վատ է աշխատելու՝ մարդու ունակություններից է կախված, որովհետև ինքն անձամբ է երդում ուտում, բայց կուսակցություն է ներկայացնում, կուսակցության շահեր, այնպես որ ձևական հայտարարություններ են դրանք։ Մեզ ավելի շատ հետաքրքրում է բովանդակային մասն ամեն ինչի, և գնահատում ենք բովանդակային մարդկանց և ոչ թե ձևի մեջ ապրող մարդկանց»:
Լուսանկարը՝ PanARMENIAN Photo-ի
