Թուրքիայի պաշտպանության նախարարությունը պայմանավորվածություն է ձեռք բերել Saab ընկերության հետ՝ TF-X կործանիչի ստեղծման հարցում համագործակցության մասին, որի մշակմամբ զբաղվում է Turkish Aerospace Industries (TAI) ընկերությունը:
Ինչպես հաղորդում է Defense News-ը, համաձայնագիրը կնքվել է երկարատև բանակցություններից հետո: Դրա հետ մեկտեղ Saab-ն արդեն խորհրդատվական աջակցություն է ցուցաբերել թուրք մասնագետներին: Մոտակա ժամանակներս Թուրքիայի ռազմաօդային ուժերին և ռազմական արդյունաբերության քարտուղարությանը կներկայացվեն մարտական ինքնաթիռի երեք նախագիծ: Զինվորականները պետք է ընտրեն դրանցից մեկը:
Ակնկալվում է, որ նախագծերը զինվորականներին կցուցադրվեն 2013թ. սեպտեմբեր-հոկտեմբերին: Գիտահետազոտական փուլի աշխատանքներից փորձակառուցողական փուլին անցնելու թույլտվություն պետք է տա Թուրքիայի վարչապետ Ռեջեփ Թայիփ Էրդողանը: TAI-ի ներկայացուցչի խոսքերով՝ եթե հաշվարկների արդյունքում պարզվի, որ կործանիչի վերջնական գինը 40-50%-ով բարձր է մարտական ինքնաթիռների գնից, որոնք հասանելի են համաշխարհային շուկայում, Էրդողանը կհրաժարվի նախագծից:
