«Առաջին լրատվական»-ի զրուցակիցն է Պահպանողական կուսակցության նախագահ Միքայել Հայրապետյանը:
– Պարոն Հայրապետյան, ինչո՞վ է առհասարակ պայմանավորված գազի գնի թանկացումը: Եթե մի կողմ դնենք Հայաստանի իշխանությունների հասցեին հնչեցրած մեղադրանքները՝ չբացառելով, որ նրանք էլ մեղավորության իրենց բաժինն ունեն, ապա, ըստ Ձեզ, ինչո՞ւ է հիմա Ռուսաստանը նման քաղաքականություն վարում, ո՞րն է դրա նպատակը:
– Գազի և ցանկացած այլ ապրանքի գնի թանկացումը ընդհանրապես պայմանավորված է շուկայի թելադրանքով, թեև աշխարհաքաղաքական գործոնը տվյալ պարագայում, անշուշտ, առկա է: Եվ այդ գործոնի կիրառումն ամենեևին ուղղված չէ Հայաստանի իշխանությունների դեմ, քանի որ սա Ռուսաստանի դրածո իշխանություն է և չի կարող անել որևէ էական բան, որ դուրս լինի ռուսական պետական շահերի շրջանակից: Խնդիրն այն է, որ Հայաստանում նույն ռուսական ազդեցության համակարգերի հետ է աշխատում նաև Արևմուտքը, որի գայթակղիչ ճնշումներին չտրվելու համար Ռուսաստանն իր հերթին բանեցնում է ավելի հզոր ճնշումներ: Այդ տրամաբանությունը բազմիցս եղել է մեր պատմության մեջ:
– Հայաստանում կարծես առաջին անգամ է, որ հստակ ձևավորված հակառուսական տրամադրություն է առաջանում՝ բողոքի ցույց Ռուսաստանի դեսպանատան առաջ և այլն, սա ինչի՞ կարող է հանգեցնել:
– Ողորմելի է այն ժողովուրդը, որը «հակա» որևէ ժողովրդի տրամադրություններ ունի. հակառուսությունը, հակաամերիկանիզմը, հակաթրքությունը ճանապարհ չեն, և, փառք Աստծո, հայ ժողովուրդն այսօր այդ հիվանդություններից միայն մեկով է մասամբ տառապում՝ հակաթրքությամբ, որն իր հիմնավոր պատճառն ունի: Իսկ ռուսական կամ որևէ այլ երկրի դեսպանատան դեմ ցույց անելը չարժե որակել որպես «հակա» տվյալ պետության կամ ժողովրդի ընդհանրապես: Ընդհակառակը՝ դա քաղաքացիական հասարակություն դառնալու հստակ ցուցիչներից է: Պահպանողականներս ցույցեր ենք արել թե՛ ամերիկյան դեսպանատան առջև՝ Իրաքի առաջին ռմբակոծման առիթով մեր բողոքը հայտնելով, թե՛ ռուսական դեսպանատան առջև՝ իրենց երկրում հայկական գերեզմանները պղծելու առիթով մեր վրդովմունքը հայտնելով, իսկ մեկ անգամ էլ՝ 2008թ. մարտի 1-ից հետո, երբ պետական մակարդակով շնորհակալություն հայտնվեց Պուտինին: Ժամանակի մամուլը դրան վախվորած է անդրադարձել:
– Ի՞նչ եք կարծում՝ գազի գնի թանկացումն է, որ պետք է պոռթկում առաջացներ մեր երկրում, չե՞ք կարծում, որ սա նվազագույնն է, որ վերջին շրջանում Ռուսաստանն արել է Հայաստանի հանդեպ:
– Հայաստանի հանդեպ Ռուսաստանի արածները միանգամայն ադեկվատ են մեր քաղաքական էլիտային, մասնավորապես՝ իշխող վերնախավին: Խնդիրն այն է, թե Հայաստանի քաղաքացիներն արժանի՞ են ավելի լավ իշխանության, որի հանդեպ ոչ մի Ռուսաստան չէր հանդգնի իրեն այսպես լկտի ստրկատիրոջ պես պահել: Եթե այդ որակը չի փոխվելու, ապա ի՞նչ տարբերություն՝ Ռուսաստանն է նվաստացնելու մեզ, թե՞ մեկ այլ երկիր:
– Իսկ որքանո՞վ կարող է սա Ռուսաստանի կողմից ճնշում լինել Հայաստանի նկատմամբ՝ Մաքսային միությանն անդամագրվելու իմաստով:
– Անշուշտ, այդպիսի նպատակ ևս կարող է լինել: Բայց եկեք ցավով արձանագրենք, որ Հայաստանի հարցերը որոշվում են խոշոր խաղացողների պայմանավորվածություններով, որտեղ Հայաստանի իշխանությունները որևէ դերակատարում չունեն: Ունենալու դեպքում գուցե հետևանքներն ավելի աղետալի լինեին:
