Կեղծամակնիշ ապրանքների առևտրի ծավալն աշխարհում 2013 թվականին կազմել է 461 մլրդ դոլար, ինչը հավասար է համաշխարհային ներմուծման մոտավորապես 2,5 տոկոսին: Այդ մասին ասված է Տնտեսական համագործակցության և զարգացման կազմակերպության (ՏՀԶԿ) հաշվետվության մեջ: ՏՀԶԿ-ն նշում է, որ անօրինական առևտրից ամենից ավելի տուժում են ԱՄՆ-ի, Իտալիայի և Ֆրանսիայի բրենդները։
Հաշվետվության մեջ հաշվի են առնվել ապրանքանիշերի, դիզայնի և արտոնագրերի նկատմամբ ընկերությունների իրավունքները խախտող ապրանքները, ինչպես նաև հեղինակային իրավունքների խախտմամբ պատրաստված արտադրանքը: Ցանցահենությունը տեղ չի գտել հետազոտության մեջ:
Եվրամիություն ներմուծված բոլոր ապրանքների մոտավորապես 5 տոկոսը կեղծված է, նշում են փորձագետները:
Իրավախախտներն ամենից ավելի շատ կեղծում են ԱՄՆ-ի բրենդների արտադրանքը. նման ապրանքանիշերով ապրանքների մինչև 20 տոկոսը կեղծամակնիշ է: Դրանց հաջորդում են իտալական առևտրանիշերը (15 տոկոս), ֆրանսիական և շվեյցարական (12-ական տոկոս), ճապոնական և գերմանական բրենդները (8-ական տոկոս):
Չինաստանում է արտադրվում աշխարհում կեղծամակնիշ բոլոր ապրանքների 63,2 տոկոսը: Նրան մեծ տարբերությամբ հաջորդում են Թուրքիան (3,3 տոկոս), Սինգապուրը (1,9 տոկոս), Թաիլանդը (1,6 տոկոս) և Հնդկաստանը (1,2 տոկոս)՝ հաղորդել է «Ինտերֆաքս» գործակալությունը:
