Եվրախորհրդարանի մի շարք պատգամավորներ խոստանում են արգելափակել արտոնյալ ռեժիմով մուտքի արտոնագիր ստանալու միջոցների ընդունումը բարձրաստիճան պաշտոնյաների համար այնքան ժամանակ, քանի դեռ ԵՄ-ն չի կազմել Ռուսաստանի պաշտոնատար անձանց ցուցակ, որոնք կասկածվում են մարդու իրավունքների ոտնահարման մեջ, հաղորդում է The Financial Times-ը:
Բրյուսելում համապատասխան բաց նամակը ստորագրել են 48 խորհրդարանականներ: Պատգամավորները պահանջում են, որպեսզի Եվրամիությունն ընդունի «Մագնիտսկու ցուցակի» սեփական տարբերակը: Ինչպես նշում է թերթը, նախագիծը կարող է իրագործվել միայն այն դեպքում, եթե Եվրահանձնաժողովը տվյալ ցուցակի ընդունումը պաշտոնապես դարձնի նախապայման՝ ռուս բարձրաստիճան պաշտոնյաների՝ առանց վիզային ռեժիմի մուտքը ԵՄ հաստատելու համար: Իրավիճակի հետ ծանոթ աղբյուրի խոսքերով՝ ներկայում Եվրահանձնաժողովը քննարկում է նման նախապայմանը: Նրա խոսքերով՝ Եվրահանձնաժողովը ստիպված կլինի ընդունել այն, եթե Եվրախորհրդարանը բավականաչափ ձայն հավաքի՝ առանց մուտքի արտոնագրի ռեժիմն արգելափակելու համար:
Բրյուսելում գտնվող աղբյուրն իր հերթին հայտարարել է, որ Եվրահանձնաժողովն, ամենայն հավանականությամբ, պատրաստում է փոխզիջումային տարբերակ: Նրա խոսքերով՝ «սև ցուցակում» հայտնված ռուս բարձրաստիճան պաշտոնյաներին թույլ կտան մուտք գործել ԵՄ, սակայն նրանք մուտքի արտոնագիր ստանալու համար ստիպված կլինեն անցնել ստանդարտ ընթացակարգով:
