Ուկրաինայի վարչապետ Արսենի Յացենյուկի հրաժարականի մասին հայտարարությունը Ուկրաինայում քաղաքական անորոշության նոր շրջան է բացել: Այս մասին գրում է New York Times-ը:
Յացենյուկը նախագահ Պյոտր Պորոշենկոյի հետ միասին վայելում էր Արևմուտքի տպավորիչ աջակցությունը, որը ենթադրում էր, որ այդ երկու քաղաքական գործիչները կպահեն իշխանության հավասարակշռությունը երկրում: Սակայն երբ նախագահն ու վարչապետը ցույց տվեցին միասին աշխատելու անկարողություն, արևմտյան դաշնակիցները կանգնեցին Պորոշենկոյի կողմը՝ Յացենյուկին ստիպելով հեռանալ՝ գրում է պարբերականը:
Յացենյուկի հանդեպ Արևմուտքի վստահությունը գոլորշիացավ վարչապետի մեծաթիվ տապալումների և նրա մասնակցությամբ սկանդալների պատճառով: Նա ոչ միայն չկարողացավ հաղթահարել Ուկրաինայի ֆինանսական և քաղաքական խնդիրները, այլև ինքը նպաստեց դրանց խորացմանը՝ կոռուպցիայի հարցոմ թողտվությամբ և ուժեղացնելով օլիգարխների իշխանությունը, առանց որոնց չէր լուծում ոչ մի կարևոր հարց՝ նշում է հոդվածագիրը:
«Նա չկարողացավ ազատվել ցանկացած որոշման ժամանակ օլիգարխների հետ խորհրդակցելու սովորությունից»,- հայտարարել է «Պյոտր Պորոշենկոյի բլոկ» կուսակցության ղեկավար Յուրի Լուցենկոն New York Times-ին տված հարցազրույցում:
Վերջիվերջո, Արսենի Յացենյուկը դարձավ անելանելիության խորհրդանիշ, որն Ուկրաինային վրա է հասել, երբ կատաղի եվրոպամետ շարժումների ժամանակն ավարտվեց՝ եզրափակում է պարբերականը:
