Ադրբեջանական 1news.az կայքի փոխանցմամբ, Ադրբեջանում Վրաստանի դեսպանատունը մեկնաբանել է Վրաստանի կողմից Ադրբեջանում հեղափոխության նախապատրաստման մասին վրաց լեյբորիստների արած հայտարարությունը.
«Դա այնքան հիմար ու անհեթեթ հայտարարություն է, որ դեսպանատունը չի ցանկանում մեկնաբանել այն: Մի շարք մարդկանց նախանձն են հարուցում մեր «եղբայրական» հարաբերությունները: Դրա համար էլ նրանք կեղտոտ հնարքներով ցանկանում են սեպ խրել մեր միջև:
Սակայն մեր փոխհարաբերություններն այնքան ամուր են, որ «ոչ մի ուժ» չի կարող վնասել դրանց: Ի հակադրություն չարակամների` վրաց-ադրբեջանական հարաբերություններն առավել կսերտանան ու կամրագրվեն»:
Հիշեցնենք, որ վրաց լեյբորիստները հայտարարել էին, որ ոչ վաղ անցյալում Ադրբեջանում ԱՄՆ դեսպան Մեթյու Բրայզան Թբիլիսիում հանդիպում է ունեցել Վրաստանի նախագահ Միխեիլ Սաակաշվիլիի և Ազգային անվտանգության խորհրդի (ԱԱԽ) քարտուղար Գիգա Բոկերիայի հետ ու քննարկել Ադրբեջանի նախագահ Իլհամ Ալիևի գահընկեցության հարցը:
