Հայաստանում ԱՄՆ դեսպանատունը պաշտոնապես հաստատեց ԱՄՆ դեսպան Մարի Յովանվիչի Հայաստանից հեռանալու տեղեկությունը: Դեսպանը կհեռանա հունիսին:
Համաձայնեք, որ հետաքրքրական է: Հայաստանում ԱՄՆ դեսպան Մարի Յովանովիչը հեռանում է Հայաստանի ներքաղաքական զարգացումների համար հանգուցային դիտվող ամսից` մայիսից հետո: Եվ այդ առումով բավական ուշագրավ է հիշատակել այն հանգամանքը, որ վերջին շրջանում ծավալված ընդդիմություն-իշխանություն գործընթացի միջնորդական ջանքը հայաստանյան լրատվամիջոցները վերագրում էին հենց ԱՄՆ դեսպան Մարի Յովանովիչին: Եվ այն, որ ընդդիմության և իշխանության փոխհարաբերություններում տեղի ունեցավ շատ արագ և փաստացի շրջադարձային փոփոխություն, անկախ այն բանից, թե որքան կտևի այն և ինչ շարունակություն կունենա, վկայում է, որ դեսպան Յովանովիչը կատարել է իր խնդիրը և նա այլևս Հայաստանում անելիք չունի. «Մավրն» արեց իր գործը, «մավրը» կարող է հեռանալ:
Ի՞նչ է սպասվում դրանից հետո: Հատկանշական ևս մի դրվագ: Հայաստանում նախագահի և խորհրդարանի նախորդ ընտրություններն ԱՄՆ-ը փաստորեն անցկացրեց առանց դեսպանի: Ջոն Էվանսը հայտնի պատմությունից հետո հեռացել էր, իսկ նոր դեսպանն այդպես էլ ոչ մի կերպ չէր նշանակվում: ԱՄՆ-ն Հայաստանում դեսպան նշանակեց ընտրությունից հետո միայն, և հետաքրքրական էր, որ նշանակվեց մինչ այդ Ղրղզստանում աշխատած Մարի Յովանովիչը: Իսկ թե մինչ այդ ինչ էր եղել Ղրղզստանում, հիշում են թերևս բոլորը` նախկին նախագահ Ակաևը հեռացել էլ ժողովրդական հուզումների հետևանքով: Ուղղակի իմաստով Հայաստանում նախագահի հեռացում տեղի չունեցավ, սակայն այն, ինչ տեղի է ունենում ներքաղաքական դաշտում այժմ` փաստացի պակաս հեղափոխական չէ իր էությամբ, քանի որ ներկայիս դաշտից էլ կարծես թե հեռացվում է Ռոբերտ Քոչարյանը, կարծես թե իր «էպոխայի» հետ միասին: Ըստ ամենայնի, պետք է ենթադրել, որ Հայաստանը թևակոխում է նոր էպոխա, որի մասին որոշակի պատկերացումների նախադրյալներ կարող է առաջացնել հենց ԱՄՆ նոր դեսպանի նշանակումը:
Ո՞ւմ կառաջադրի ԱՄՆ-ը Հայաստանի համար: Պարզ է, որ ներկայիս հանգուցային փուլում ԱՄՆ-ը Հայաստանը չի թողնի առանց դեսպանի, թեև իհարկե շատ դեպքերում էլ դեսպանի կարգավիճակը պայմանական է և ասենք կարող է բավական մեծ գործ անել անգամ պաշտոնակատարը: Բայց, բոլոր դեպքերում, ԱՄՆ-ն առաջիկա դիվանագիտական կադրային քաղաքականությունը Հայաստանի հանդեպ, թերևս որոշակի հիմքեր կտա ենթադրություններ անելու զարգացումների հետագա ընթացքի մասին: Չի բացառվում իհարկե, որ Միացյալ Նահանգները 2007-08-ի տարբերակով որոշեն առանց դեսպանի անցկացնել նաև Հայաստանի 2012-13 ընտրական փուլը, ինչն ի դեպ նույնպես կլինի վերաբերմունքի հետաքրքիր դրսևորում: