ՀԱԿ խմբակցության պատգամավոր Նիկոլ Փաշինյանն այսօր Ազգային ժողովում 2012թ. բյուջեի կատարողականի քննարկումների ժամանակ Արարատի մարզպետ Էդիկ Բարսեղյանին հարցրեց, թե այս տարի մարզում որքան առաջին դասարանցիներ են դպրոց գնացել: Է. Բարսեղյանը հարցը կատակին տալով՝ ասաց, որ այս տարի ինքն էլ պատրաստված է եկել այս քննարկումներին, հատկապես այդ հարցի պատասխանը ունենալու համար 2 ժամ աշխատել է, քանի որ գիտի՝ Ն. Փաշինյանն այն ուղղելու է իրեն:
Նախորդ տարի Ն. Փաշինյանը դարձյալ այդ հարցն էր տվել Է. Բարսեղյանին, բայց մարզպետը չէր կարողացել պատասխանել ու այս տարի հատուկ է պատրաստվել:
«2011-ին մարզն ունեցել է առաջին դասարանի 3.158 աշակերտ, իսկ 2012-13 ուստարում նրանց թիվը կազմում է 3191։ Հուրախություն մեզ՝ 43 աշակերտով ավելացել է. բոլոր ծխամատյաններով ստուգել եմ»,- ասաց նա:
Ն. Փաշինյանի ու Է. Բարսեղյանի այս հարցուպատասխանից հետո մյուս մարզերի ներկայացուցիչները միանգամից դուրս եկան դահլիճից և սկսեցին զանգել իրենց մարզպետարաններ՝ ճշտելու համար, թե իրենց մարզում որքան առաջին դասարանցիներ են եղել այս տարի: Օրինակ՝ քննարկումներին չէր մասնակցում Սյունիքի մարզպետ Սուրիկ Խաչատրյանը, բայց նրան փոխարինող մարզպետարանի աշխատակիցը միանգամից դուրս թռավ ու հեռախոսազրույցով սկսեց ճշտել այդ տվյալը: Բայց դրանից հետո երբ «Առաջին լրատվական»-ի թղթակիցը փորձեց նրանից ճշտել, թե Ն. Փաշինյանի հարցի պատասխա՞նն է ճշտում, նա միանգամից հերքեց ու ասաց, որ այլ բան էր հարցնում: