Ամերիկացի հաղորդավոր Լարի Քինգը հերքել է տեղեկությունները, թե ինքը աշխատելու է ռուսական Russia Today հեռուստաալիքում:
Ինչպես հաղորդել է լրագրողը Facebook-ի իր էջում, RT-ի հետ իր համագործակցության մասին տարածվել են խեղաթյուրված լուրեր:
Քինգի խոսքով՝ ռուսական հեռուստաալիքի եթերում իսկապես ցուցադրվելու է իր՝ Larry King Now անվանումը կրող ծրագիրը, սակայն այդ հաղորդման իրավունքները պատկանում են հենց Քինգին ու նրա հիմնադրած Ora TV-ին: Այն հեռարձակվելու է այդ հեռուստաալիքով, ինչպես նաև Hulu-ով:
Ինչպես գրում է Քինգը, Russia Today-ը ընդամենը ձեռք է բերել իր ծրագրի հեռարձակման իրավունքը: Larry King Now-ն կհեռարձակվի հունիսի 3-ից՝ ամեն երեկո:
Քինգն ընդգծում է, որ Russia Today-ը ոչ մի կերպ չի կարող ազդել իր ծրագրերի բովանդակության վրա: Նրա խոսքով՝ իր նոր ծրագրի հեռարձակման իրավունքը ձեռք են բերել նաև տարբեր երկրների հեռուստաալիքներ:
Այն մասին, որ Լարի Քինգը՝ ամերիկյան հեռուստատեսության լեգենդը, դառնալու է Russia Today-ի հաղորդավար, մայիսի 29-ին հայտնել էր հեռուստաալիքի գլխավոր խմբագիր Մարգարիտա Սիմոնյանը:
