Gazeta.ru-ի փոխանցմամբ՝ Թուրքիայի նախագահը սկսում է իր այցն ԱՄՆ, որը հեշտ չի լինելու: Սպիտակ տանն արդեն իսկ հայտարարել են, որ ԱՄՆ նախագահը չի հանդիպելու Թուրքիայի նախագահի հետ:
Դրա հետ մեկտեղ ԱՄՆ-ի ու Թուրքիայի միջև կուտակվել են զայրացնող ոչ քիչ գործոններ, և «վերաբեռնումը» պետք է ակնկալել արդեն Սպիտակ տան նոր ղեկավարից:
Էրդողանը ժամանում է Վաշինգտոն՝ միջուկային անվտանգության գագաթնաժողովին, որին մասնակցելու է նաև Բարաք Օբաման: Սակայն նրանց միջև անձնական հանդիպում նախատեսված չէ: ԱՄՆ նախագահը չի մասնակցի նաև Մերիլենդում թուրքական մզկիթի բացմանը, որտեղ նրան առաջարկել էր հանդիպել Էրդողանը: Օբամայի փոխարեն Թուրքիայի նախագահի հետ հանդիպելու է ԱՄՆ փոխնախագահ Ջոզեֆ Բայդենը:
Էրդողանի ամերիկյան այցը կայանալու է մարտի 29-ից մինչև ապրիլի 4-ը: The Wall Street Journal-ը կանխատեսում է, որ ԱՄՆ-ում Թուրքիայի նախագահին սպասվում է սառը ընդունելություն: Պարբերականը թուրք-ամերիկյան հարաբերություններում խնդրահարույց հարցերի թվում նշում է քրդերի դեմ Էրդողանի պայքարը, ինչպես նաև ընդդիմությանն ու ԶԼՄ-ներին ճնշումները:
Պարբերականն ընդգծում է, որ Էրդողանի ամերիկյան այս այցը զգալիորեն տարբերվելու է 2013 թվականին նրա ամերիկյան այցից: Այն ժամանակ Օբաման թուրք գործընկերոջն ընդունել է պատիվներով և ամեն կերպ ցուցադրել է նրան իր դիրքը:
Օբամայի ու Էրդողանի՝ երբեմնի ընկերական հարաբերությունները վերջին շրջանում իսկապես վատթարացել են սիրիական հակամարտության ֆոնին: Մերձավոր Արևելքում ԱՄՆ-ի կարևոր դաշնակից, ՆԱՏՕ-ի անդամ Թուրքիան դժգոհ է, որ Վաշինգտոնն աջակցում է քրդական ջոկատներին, որոնց նա այդ երկրում դասում է ահաբեկչական խմբավորումների թվին:
ԱՄՆ-ի համար քրդական մարտական խմբավորումները դաշնակիցներ են Սիրիայում ահաբեկչական կազմակերպությունների դեմ պայքարում: Էրդողանն ակտիվորեն դժգոհել է քրդերին ԱՄՆ-ի աջակցության համար և փետրվարի կեսին հայտարարել է, որ քրդերի հանդեպ ԱՄՆ-ի քաղաքականությունը «հանգեցրել է արյան գետերի»:
Օբաման իր հերթին ավելի վաղ թուրք առաջնորդին կոչ էր արել դադարեցնել Սիրիայի տարածքում քրդերի դիրքերի հրետակոծությունները: Թուրքիան հարվածներ է հասցնում փետրվարի 14-ից՝ վստահեցնելով, որ պայքարում է ահաբեկչության դեմ:
Այսօր, երբ Սիրիայում ԱՄՆ-ի ու Ռուսաստանի հովանու ներքո սկսվել է քաղաքական կարգավորման գործընթաց, Թուրքիան՝ որպես քաղաքական ակտիվ խաղացող, գործնականում մնացել է խաղից դուրս վիճակում:
Բացի այդ, ԱՄՆ-ը գոհ չէ, որ Անկարան ճնշում է գործադրում ԵՄ իշխանությունների վրա՝ սպառնալով մեծացնել դեպի Եվրոպա միգրացիոն հոսքը: Վաշինգտոնը չի կարող չզգալ, թե որքան արդյունավետ է Էրդողանի այդ շանտաժը, ով ցանկանում է մեծացնել իր ազդեցությունը ԵՄ-ի վրա:
ԱՄՆ-ում կայանալիք մամուլի ասուլիսների ժամանակ Էրդողանը կարող է բախվել նաև թուրքական ներքին քաղաքականության վերաբերյալ տհաճ հարցերի, որոնք մասնավորապես վերաբերելու են հումանիտար ոլորտում տիրող վիճակին ու լրագրողների իրավունքներին: ԱՄՆ-ում լիբերալ բազում պարբերականներ բացահայտ կերպով Էրդողանին անվանում են բռնապետ:
Փենսիլվանիա նահանգում, որը գտնվում է Վաշինգտոնից մի քանի կիլոմետր հեռավորության վրա, ապրում է Էրդողանի ամենամեծ թշնամին՝ թուրք իմամ Ֆեթհուլլահ Գյուլենը: Վերջինս լուրջ ազդեցություն ունի Թուրքիայի նախագահի հակառակորդների վրա երկրի ներսում և շատերի կողմից դիտարկվում է որպես վտարանդիության մեջ գտնվող ընդդիմության առաջնորդ:
Էրդողանի այցից քիչ առաջ ԱՄՆ-ում կալանավորվել է թուրք ազդեցիկ գործարար Ռեզա Զարաբը, ով, մամուլի տվյալներով, կապված է եղել Թուրքիայի բարձրագույն ղեկավարության հետ: Թուրք գործարարն ԱՄՆ տարածքում կազմակերպել է ամերիկյան պատժամիջոցների շրջանցմամբ Իրանի հետ առևտուր:
Փորձագետները հակված չեն կարծել, թե Օբաման ու Էրդողանը կկարողանան բարելավել իրենց հարաբերությունները, և որ Էրդողանի համար ներկայումս կարևոր է հարաբերություններ կառուցել ԱՄՆ նոր ղեկավարության հետ: ԱՄՆ նախագահի պաշտոնում Օբամայի լիազորություններն ավարտվելու են տարեվերջին:
Չի բացառվում, որ Էրդողանն իր ամերիկյան այցը կարող է օգտագործել՝ հանդիպելու համար ԱՄՆ Դեմոկրատական կուսակցությունից նախագահի պոտենցիալ թեկնածու, նախկին պետքարտուղար Հիլարի Քլինթոնի հետ, որը վերջին հարցումների համաձայն՝ ունի ԱՄՆ նոր առաջնորդ դառնալու ամենամեծ հնարավորությունները:
