Լոռու մարզի Կաթնառատ գյուղում կառուցված «Կալինինոյի Գրաֆ Գոտլիբ պանրագործարան»-ը, որը ժամանակին կառուցել են Շվեյցարիայից ժամանած վարպետները՝ շվեյցարական տեխնոլոգիայով, շուրջ երեք տարի ոչ միայն սնանկացել է, այլև գործարանի տերը բիզնեսն անտեր թողել, հեռացել է երկրից:
Նշենք, որ սա Հայաստանում արձանագրված երկրորդ դեպքն է, երբ սնանկացած գործարարը բիզնեսը թողնում ու անհետանում է: ժամանակ առաջ մենք գրել էինք, որ բիզնեսը՝ գործարանն ու ձկնարտադրության ջրավազանները թողել, հեռացել է «Յունիֆիշ»-ի սեփականատերը:
Ինչ վերաբերում է «Կալինինոյի Գրաֆ Գոտլիբ պանրագործարան»-ին, ապա այս ընկերության սնանկության գործերով կառավարիչ Լևոն Պետրոսյանը մեզ հետ զրույցում ասաց, որ ընկերությունը դատարանի վճռով սնանկ է ճանաչվել «Յունիբանկ»-ի պահանջով, քանի որ չի կատարել վարկային պարտավորությունները: Ընկերության սեփականատերը՝ Արշավիր Խաչատրյանի դեմ ժամանակին քրգործ է հառուցվել և հայտարարվել է հետախուզում, սակայն, հետո այն կարճվել է հանցակազմի բացակայության պատճառով:
Փետրվարի 26-ին հայտարարվել է ընկերության՝ «Յունիբանկ»-ում գրավադրված գույքի վաճառքի աճուրդի մասին: Թե ինչն է եղել պանրի գործարանի սնանկության պատճառը, սնանկության գործերով կառավարիչը չգիտի: «Երբ որ տերը գտնվի, կասի՝ ինչ պատճառներով է փախել: Կարծում եմ՝ դա եղել է ընկերության սխալ ղեկավարման արդյունքում: Վարկերը վերցրել է, պարտավորությունը չի կատարել, ընկել է սնանկության մեջ»,- ասաց Լևոն Պետրոսյանը: Նրա խոսքերով՝ տերը՝ Արշավիր Խաչատրյանն իրեն սկզբում մի երկու անգամ զանգել է Ռուսաստանից, սակայն հետո կապը կտրվել է:
Փետրվարի 26-ին պանրի գործարանի գույքի կրկնաճուրդը չի կայացել հայտ չլինելու պատճառով: «Կալինինոյի Գրաֆ Գոտլիբ պանրագործարան»-ի սնանկության գործով կառավարիչ Լևոն Պետրոսյանի կողմից գույքի կրկնաճուրդը տեղի կունենա մարտի 30-ին Լոռու մարզի ընդհանուր իրավասության դատարանի շենքում:
Աճուրդի մեկնարկային գինը կազմել է 10 մլն 760 հազար դրամ: Աճուրդի է հանվելու Լոռու մարզի Կաթնառատ գյուղում գտնվող և Արշավիր Խաչատրյանին սեփականության իրավունքով պատկանող 526․9 քառ. մետր պանրի գործարանը՝ 9 մլն 800 հազար դրամով,նաև Կաթնառատ գյուղում գտնվող և սեփականատիրոջ եղբորը՝ Անդրանիկ Խաչատրյանին պատկանող անասնապահական համալիրը: Սնանկության կառավարչի խոսքերով՝ անասնապահական համալիրից առկա են միայն պարիսպը, երկաթբետոնյա սյուները և ֆերմաները, հողամասի մակերեսը` 8 հեկտար: Հողի կադաստրային արժեքը մուծված չէ: Անասնապահական համալիրի արժեքը կազմում է 960 հազար դրամ: Լևոն Պետրոսյանի խոսքերով՝ գործարանը ևս թալանված վիճակում է. «Շվեյցարիայից են եկել, մոնտաժել այդ գործարանը, որը թալանել, տարել է տերը»:
Լոռու մարզի Աչաջուր գյուղի գյուղապետ Ռուբիկ Ղազարյանը մեզ հետ զրույցում պատմեց, որ գործարանը նախ եղել է «Տաշիր» պանրի գործարանի մասնաճյուղը, ապա վաճառվել է Արշավիր Խաչատրյանին: Դրանից հետո 2-3 տարի գործարանը նորմալ աշխատել ու արտադրանք է տվել, գյուղացիներից ոմանք աշխատել են այդտեղ, սակայն հետո անհայտ պատճառներով սնանկացել է:
Գյուղապետ Ռուբիկ Ղազարյանի խոսքերով՝ Հայաստանից անհայտ ուղղությամբ հեռացած Արշավիր Խաչատրյանը համայնքին ևս հսկայական պարտքեր ունի: Մեր հարցին ի պատասխան գյուղապետը հավաստիացրեց, որ գործարանը երբևէ առնչություն չի ունեցել ռուսաստանաբնակ գործարար Սամվել Կարապետյանի ու նրա «Տաշիր Գրուպ»-ի հետ:
