«Մանկապղծությունը հարվածում է Հայոց եկեղեցուն». Le Progrès թերթը մարտի 19-ի իր համարում վերոնշյալ խորագրով հոդված է գրել, որում ասվում է, որ մինչ ֆրանսիական Եկեղեցու Լիոնի թեմը մանկապղծության ծանրակշիռ պնդումներին դիմագրավում է, այս օրերին այլ նման այլ դեպք ի հայտ եկավ Հայոց եկեղեցու ներսում: Խոսքը վերաբերում է Դավիթ Արք. Սահակյանին, որի մահվան մասին վերջերս է հայտնել թերթը:
Թերթը գրում է, որ 2013-ի հուլիսի 22-ին նրա դեմ բողոք էր ներկայացված սեռական հարձակման և բռնաբարման պնդումներով, որոնք, ըստ պնդողի, գործվել էին 1990-ին Երուսաղեմում՝ այն տարիներին, երբ Դավիթ Արք.-ը պաշտոնավարում էր այնտեղ: Ըստ թերթի՝ 13 տարեկան զոհը մանրամասն պատմել է, թե իրեն ինչեր են պարտադրվել: 2015-ի հունվարի 22-ին հայ հոգևորականը քննության է ենթարկվել, և անցկացվել է դատական հետաքննություն: Իսկ 2016-ի փետրվարի 22-ին դատախազությունը իր մեղադրանքը վերջնական հայտարարելով՝ գործը փոխանցել է Պատժիչ դատարան՝ 15 տարեկանից փոքր անչափահասի դեմ սեռական հարձակման մեղադրանքով: Մինչ սպասվում էր, որ քննիչ դատավորը կարտահայտվի այդ դատին մասին, Դավիթ Արք.-ը վախճանվել է:
Թերթը գրում է, որ նրա մահով այս հարցը կարող էր փակվել: Բայց զոհը՝ ոմն Հրայր, որոշել է հարցը տարածել սոցցանցերում, որպեսզի այն չանտեսվի, և ըստ իր փաստաբանի՝ «որպեսզի նման բաներ այլևս չկրկնվեն»:
Le Progrès-ը գրում է նաև, որ Լիոնի հայ համայնքի ներկա հոգևոր հովվին ցնցել է այս լուրը: Թերթը հավելում է, որ զոհը նույն պատճառներով մեղադրում է նաև երկու այլ հոգևորականների՝ շեշտելով, թե սեռական այդ հարձակումները շարունակվել են մինչև իր 19 տարեկանը:
