Մարտի 17-ին Մարդու իրավունքների եվրոպական դատարանը կհրապարակի աղմկահարույց «Մատաղիսի» գործի առնչությամբ գանգատների վերաբերյալ վճիռը: Շիրակի մարզի դատարանի կողմից արդարացված Ռազմիկ Սարգսյանի, Մուսա Սերոբյանի ու Արայիկ Զալյանի փաստաբան Հայկ Ալումյանն այսօր «Առաջին լրատվական»-ի հետ զրույցում նշեց՝ լիահույս է, որ ՄԻԵԴ-ը կճանաչի խոշտանգումների մասով իր պաշտպանյալների խախտված իրավունքները, իսկ գործով փաստաբան և ՄԻԵԴ հայցը ուղարկած պատգամավոր Զարուհի Փոստանջյանը նշել է, որ իր միակ ցանկությունն այն է, որ ՄԻԵԴ վճռից հետո գործով անցնող բոլոր պատասխանատու անձինք, այդ թվում՝ վերահսկողություն իրականացնողները պատասխանատվության ենթարկվեն։
Հիշեցնենք, որ այդ ժամանակ ՀՀ զինդատախազը ներկայումս ՀԱԿ խմբակցության պատգամավոր Գագիկ Ջհանգիրյանն էր։ «Իմ նպատակը դա է, որ մեղավորներն ու պատասխանատուները պատասխանատվության ենթարկվեն, անցնեն արդարադատության միջով։ Հակառակ դեպքում, եթե նրանք շարունակեն բարձր պաշտոններ զբաղեցնել, ապա արդարությունը ոչ մի դեպքւոմ, թեկուզ ՄԻԵԴ վճռից հետո չի վերականգնվի»,- ասաց Փոստանջյանը։
Հիշեցնենք, որ ՄԻԵԴ ներկայացված հայցով պետք է պարզվի՝ արդյո՞ք եղել են խոշտանգումներ, թե ոչ, արդյո՞ք Հայաստանում պատշաճ ձևով քննվել է խոշտանգումների հարցը, թե ոչ: Հայկ Ալումյանը մեզ հետ զրույցում նշեց, որ հայցում, մասնավորապես բարձրացվել է վերը նշված երեք հոգու չորս օր ապօրինի անազատության մեջ պահելու հարցը: Հենց այդ ընթացքում էլ իրականացված խոշտանգումների ազդեցության ներքո փորձ է արվել նրանցից խոստովանական ցուցմունքներ կորզել, որի հետևանքով անձանցից մեկը չէր դիմացել այդ խոշտանգումներին ու տվել էր այդպիսի ցուցմունք, որից հետո նոր սկսել էին լրացնել թղթերը։
Առավել մանրամասն՝ տեսանյութում