Երևանի քաղաքապետարանում տեղի ունեցած խորհրդակցության ժամանակ, որը վարել է քաղաքապետ Տարոն Մարգարյանը, ամփոփվել են մայրաքաղաքի վարչական շրջանների 2016թ. փետրվարի ընթացքում կատարած աշխատանքների գնահատման և վերլուծության արդյունքները: Ինչպես տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, ներկայացնելով քաղաքային տնտեսության տարբեր ոլորտներում կատարած աշխատանքների ամփոփ ցուցանիշները` քաղաքապետի խորհրդական Արայիկ Քոթանջյանը նշել է, որ աղյուսակային ընդհանուր սանդղակում առաջին հորիզոնականը զբաղեցրել է Շենգավիթ, երկրորդը՝ Դավթաշեն, իսկ երրորդ տեղը Նոր Նորք վարչական շրջանը: 2016թ-ի փետրվար ամսվա ամփոփիչ գնահատման և վերլուծության արդյունքներով ամենացածր ցուցանիշը գրանցել է Նորք-Մարաշ վարչական շրջանը:
Անդրադառնալով գնահատման և վերլուծության արդյունքներին՝ քաղաքապետ Տարոն Մարգարյանը հանձնարարել է համապատասխան ցուցանիշներն ապահովելու հարցում լինել առավել հետևողական: «Յուրաքանչյուր վարչական շրջան պարտավոր է իր աշխատանքները կազմակերպել այնպես, որ գնահատման աղյուսակային ընդհանուր սանդղակում ներառված բոլոր ոլորտներում կարողանա ապահովել առաջընթաց: Գնահատման համակարգում ընդգրկված են այն ոլորտները, որոնք ապահովում են մայրաքաղաքի համաչափ զարգացումը: Ուստի եղեք հետևողական և բոլոր ուղղություններով աշխատանքներ ը պահեք մշտական հսկողության տակ: Այն պահանջներն ու սկզբունքները, որոնք դրվում են մեր աշխատակարգում, բխում են հենց մեր համաքաղաքացիների շահերից, և ուրեմն դրված խնդիրներին պետք է տալ այնպիսի լուծումներ, որ վերջնարդյունքում մեր բնակիչները գոհ մնան կատարած աշխատանքից»,- ընդգծել է քաղաքապետը:
Խորհրդակցության շրջանակում ներկայացվել են նաև քաղաքապետարանի աշխատակազմի վարչությունների ու բաժինների գործառույթների 2016թ.-ի փետրվար ամսվա գնահատման արդյունքները: Քաղաքապետը հանձնարարել է լինել առավել հետևողական «Թեժ գծով» ստացված ահազանգերին տրված պատասխաններին, քաղաքացիների ընդունելության կազմակերպման ու աշխատանքային կարգապահության ցուցանիշներին՝ թերացումները շտկելու և բացառելու համար: Հանձնարարվել է նաև քաղաքապետարանի աշխատակազմի վարչությունների ու բաժինների գործառույթների շրջանակում իրականացվ ող աշխատանքների գնահատմանը զուգահեռ այսուհետ ներկայացնել նաև քաղաքապետարանի ենթակայության ՓԲԸ-ների աշխատանքների գնահատումը:
