Անցած տարի՝ մայիսի 2-ին, Սյունիքի մարզի Սդղի գյոլ կոչվող տարածքում Սյունիքի մարզպետ Սուրիկ Խաչատրյանի ազգականների մասնակցությամբ տեղի ունեցած վիճաբանության արդյունքում կուրացած Հարութ Զաքարյանի հայրը միտում չի տեսնում գործով դատավորի փոփոխության մեջ:
Հիշեցնենք, որ քրեական գործն ի սկզբանե մակագրվել էր դատավոր Նապոլեոն Օհանյանին և մի քանի նիստ նրա նախագահությամբ էր կայացել, սակայն օրերս գործը մակագրվել է Սյունիքի մարզի ընդհանուր իրավասության դատարանի դատավոր Անդրանիկ Մնացականյանին:
Գագիկ Զաքարյանին բավարարում է, որ այս պահին գործով 6 մեղադրյալ կա, և չի անհանգստացնում փաստը, որ Սուրիկ Խաչատրյանի որդին, որը համարվում էր միջադեպի հիմնական կազմակերպիչն ու մասնակիցը, դուրս մնաց գործից։ Ավելին՝ դեպքից հետո պաշտոն ստացավ։ «Նախաքննությունը նորմալ ընթացել ա, 6 հոգի դատվում են, 2-ը նստած են, 4-ն էլ գրավի դիմաց բաց են թողնվել։ Քանի հոգի եղել են, էնքանն էլ դատվում են, ուրիշ մարդ չկա»,- «Առաջին լրատվական»-ի հետ զրույցում ասաց Հարութի հայրը։
Մեր դիտարկմանը, թե ինքը նախկինում պնդում էր, որ Սուրիկ Խաչատրյանի որդին՝ Տիգրան Խաչատրյանը, մասնակից է եղել ծեծկռտուքին, ինքն է հարվածել Հարութի աչքին, Գագիկ Զաքարյանն արձագանքեց. «Դա մեր գործը չի, դա քննչական մարմինների գործն ա։ Եթե մարդը խոստովանել է, որ ինքն է խփել, 4-5 հոգի էլ ցուցմունք են տվել, որ ինքն է խփել, եզրակացությունը եղել է, որ նույն մարդն է խփել, էլ իմ ձեռքն ինչ կա։ Ես վկա չեմ եղել, որ ասեմ ինքն է խփել։ Եթե քննություն է գնացել և պարզվել է, որ ինքը մեղավոր չի, ես ինչ կարող եմ ասել։ Ուրեմն էդպես է եղել»,- հավելեց Զաքարյանը։
Հիշեցնենք, որ գործով իրականացված նախաքննության ժամանակ պարզվել էր, որ միջադեպի հիմնական մասնակիցը և Հարութին ու նրա եղբորը հարվածներ հասցնողը եղել է Յուրի Մանուչարյանը։ Վերջինիս մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և 113-րդ հոդվածի 2-րդ մասի 3-րդ կետով։ Իսկ ծեծի մասնակից մյուս մեղադրյալներին՝ Դերենիկ Հակոբյանին, Շահում Դավթյանին, Սուրիկ Խաչատրյանի եղբայրներ Մայիս, Էյներ և Սեյրան Խաչատրյաններին, մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 3-րդ կետի հատկանիշներով:
Ինչ վերաբերում է Հարութի առողջական վիճակին, ապա բժիշկներին առ այսօր չի հաջողվել վերականգնել աչքի տեսողությունը գոնե որևէ տոկոսով։ Հոր խոսքով՝ մինչ օրս ամեն ինչ արվել է աչքը պահպանելու համար, տեսողությունը վերականգնելու ուղղությամբ դեռ չեն աշխատում։ «Հիմա Հարութը Մոսկվայում է։ Մոսկվայի իրա պրոֆեսորը դեռ երկու վիրահատություն էլ պետք է անի, որից հետո պետք է տեղափոխեն Իտալիա՝ Միլան, որտեղ, տեսնենք, հնարավոր կլինի տեսողությունը ինչ որ չափով վերականգնի, թե ոչ»։