Քաղցկեղի զարգացման արագացմանը նպաստում են վատ քունը և «հզոր» խռմփոցը: Այդ եզրակացությանն են հանգել Իսպանիայի և ԱՄՆ-ի բժիշկները, ովքեր իրենց բացահայտման մասին պատմել են Մյունխենում ուռուցքաբանական եվրոպական ասոցիացիայի ժամանակ: Այդ մասին հայտնում է EurekAlert!-ը:
Քաղցկեղի զարգացման արագացման պատճառը քնի ժամանակ ապնոէի դեպքում (շնչառության կարճաժամկետ կանգ) գիտնականները անվանել են հիպոքսիա`թթվածնի անբավարար քանակություն որևէ օրգանում կամ հյուսվածքում: Դա նպաստում է ուռուցքային հյուսվածքներում արյունատար անոթների ավելացմանը, որոնց միջոցով քաղցկեղային բջիջները ավելի շատ թթվածին են ստանում:
Գիտնականները այդ եզրակացությանն են հանգել` հետևելով 12 առողջ և 12 երիկամներում ուռուցք ունեցող մկների: Հիվանդ մկների մոտ, որոնք ենթարկվել են ընդհատված հիպոքսիայի, գիտնականները նկատել են անոթային բջիջների թվի աճ: Նրանց կարծիքով, դա ճիշտ կլինի նաև մարդկանց համար:
Փորձագետները ենթադրում են, որ չծխողների, ոչ գեր և սպորտով զբաղվող մարդկանց մոտ քաղցկեղով հիվանդանալու ցածր մակարդակը բացատրվում է առողջ օրգանների և հյուսվածքների թթվածնի լավ մատակարարմամբ:
