Ադրբեջանի իշխանության ներկայացուցիչներն էներգետիկական նախագծերի ֆինանսավորման համար 2 մլրդ դոլար միջոց ձեռք բերելու նպատակով ուրբաթ գիշեր բանակցություններ են անցկացրել միջազգային ներդրողների հետ: Այս մասին հայտնում է the Financial Times -ը` նշելով, որ կառավարության պարտատոմսերը վաճառքի հանելու համար վարձվել են UniCredit, Citi և JPMorgan բանկային ընկերությունները:
Նավթի գների անկման և դրա հետևանքով ստեղծված դժվար տնտեսական վիճակի հետ կապված՝ Ադրբեջանը 45 մլրդ դոլար արժողությամբ «Հարավային գազային միջանք» նախագծում խնդիրների առաջ է կանգնել 12 մլրդ դոլար իր մասնաբաժինը վճարելու հարցում:
Ադրբեջանական կողմն այդ գումարը պետք է վճարի առաջիկա երեք տարում:
Ադրբեջանի կառավարությունը ֆինանսական փաթեթի հարցը վերջերս քննարկել էր Արժույթի միջազգային հիմնադրամի և Համաշխարհային բանկի հետ։ Ավելի վաղ հայտարարվել էր, որ երկիրը 30 մլրդ դոլարի սուվերեն հիմնադրամ ունի և հիշյալ նախագծի իրականացման համար պարտք վերցնելու կարիք չունի:
Բրիտանական թերթը գրել է նաև պարտք վերցնելու հետ կապված Ադրբեջանի առաջ կանգնած դժվարությունների գործոնների մասին: Նշվում է, որ վերջին երկու ամիսներին աշխարհի բոլոր առաջատար վարկանիշային գործակալությունները Ադրբեջանի վարկային վարկանիշն իջեցրել են նվազագույն` «աղբային» մակարդակի:
The Financial Times-ը գրում է, որ Բաքվի պարտք վերցնելու գործին նաեւ խանգարում են Ադրբեջանում մարդու իրավունքների աղետալի վիճակը, ինչպես նաև հիշյալ նախագծի հնարավոր բնապահպանական ռիսկերը:
