Երեկ Լոնդոնում տեղի ունեցած զինվորականի սպանությունից հետո Մեծ Բրիտանիայի զինված ուժերի հրամանատարությունը հրաման է արձակել, համաձայն որի՝ զինծառայողներին արգելվում է համազգեստով հայտնվել հասարակական վայրերում: Այս մասին հայտնում է Sky News-ը՝ հղում անելով անանուն աղբյուրին:
Բրիտանական իշխանությունները հրահանգել են նաև ուժեղացնել անվտանգության ռեժիմը զորանոցներում և ռազմական գերատեսչության համալիրներում:
Լոնդոնի հարավարևելյան Վուլվիչ շրջանում երկու հանցագործներ դանակահարել էին բրիտանական բանակի զինծառայողի: Ականատեսների վկայությամբ՝ հանցագործները բացականչել են՝ «Ալլահ, աքբար»:
Դեպքի վայր ժամանած ոստիկանները փոխհրաձգության մեջ են մտել հանցագործների հետ ու ձերբակալել նրանց: Ներկայում չարագործները վնասվածքներով գտնվում են Լոնդոնի հիվանդանոցներում՝ կալանքի տակ:
Ոստիկանության նախնական գնահատականով՝ կատարվածը քաղաքական ենթատեքստով իսլամիստների ահաբեկչական գործողություն է:
