Չորրորդ գիշերը Ստոկհոլմի ծայրամասերում տեղի են ունեցել երիտասարդների զանգվածային անկարգություններ: Չորեքշաբթի ժամը 20.00-ից հետո հրդեհային ծառայությունում գրանցվել է 90 զանգ: Մեքենաներ են հրդեհվել մայրաքաղաքի 15 արվարձաններում:
Երբ հրշեջները ժամանել են զանգերից մեկի մատնանշած հասցեով՝ հանգցնելու Սկուգոս արվարձանի ռեստորանում բռնկված հրդեհը, հայտնվել են քարերի կարկուտի տակ: Փրկարարները կարողացել են աշխատանքի անցնել միայն ոստիկանության միջամտությունից հետո: Հարավային արվարձաններից մեկում էլ իրավապահ մարմինների ներկայացուցիչը գլխի վնասվածք է ստացել՝ սուր առարկայով հասցված հարվածից:
Հրդեհումների ու բռնարարքների կասկածանքով ոստիկանությունը ձերբակալել է 8 մարդու: Ձերբակալվածներից ամենակրտսերը 14 տարեկան է:
Վրդովմունքի ալիքի պատճառն անցած շաբաթվա իրադարձություններն էին, երբ Հուսբյու շրջանի բազմաբնակարան շենքերից մեկում ձերբակալության ժամանակ ոստիկանները կրակել էին 69-ամյա տղամարդու վրա, որը սպառնացել էր նրանց սառը զենքով: Տեղի բնակիչների խոսքով՝օպերացիայի ժամանակ իրենք դարձել են իրավապահների կողմից չարդարացված դաժանության ականատեսը, երբ մարդկանց վրա շներ են արձակվել և գործի են դրվել ռետինե մահակներ: