Մարտի մեկին Ազատության հրապարակում տեղի ունեցավ քաղաքական վեց ուժերի համատեղ հավաք-երթը․ երկարատև քննարկումներից հետո այս ուժերը կարողացան գալ համաձայնության միասնական հավաք անցկացնելու վերաբերյալ, թեպետ արդեն այսօր ընդդիմադիր «Քաղաքացիական պայմանագիր» կուսակցությունը բարձրաձայնում է՝ հանրահավաքի կազմակերպչական որոշ աշխատանքներ և գործողություններ իրենց հետ չեն համաձայնեցվել։
Մասնավորապես ՀԱԿ-ն ու «Նոր Հայաստան»-ը միասին որոշել են, որ Ազատության հրապարակում ելույթներ չեն լինելու՝ կլինեն ընդամենը «Նոր Հայաստանի» և ՀԱԿ-ի բացման խոսքը, մինչդեռ Քաղաքացիական պայմանագիրը նախապես պնդել է, որ ելույթով պետք է հանդես գա նաև Նիկոլ Փաշինյանը: Այս կուսակցության պահանջը, սակայն մերժվել է և կուսակցության անդամները տեղում են պարզել՝ ոչ թե հանրահավաք է, այլ հավաք։
«Նոր Հայաստան» հանրային փրկության ճակատի քաղխորհրդի անդամ Անդրիաս Ղուկասյանն էլ պարզաբանում է՝ որոշվել էր, որ Նիկոլ Փաշինյանը և միասնական հավաքի այլ ուժերի ներկայացուցիչներ ելույթ կունենան Մյասնիկյանի արձանի մոտ, սակայն Փաշինյանը շուտ է հեռացել:
Այն բանից հետո, երբ Մյասնիկյանի արձանի մոտ չէին այլ «Քաղաքացիական պայմանագիր» կուսակցության և Հայ ազգային կոնգրեսի ներկայացուցիչները, բարձրախոսով ելույթներ էին ունենում տարբեր նախաձեռնությունների ներկայացուցիչներ․ մասնավորապես «Ոտքի Հայաստան» նախաձեռնության անդամ Դավիթ Հովհաննիսյանը բավականին կոպիտ որակումներով՝ ակնարկելով Կոնգրեսին և Քաղպայմանագրին, բավականին կոպիտ ձևակերպումներով ընդգծեց, որ ի տարբերություն այդ ուժերի՝ իրենք արտահերթ զարգացումների կողմնակից են։
Ալեն Սիմոնյանը, անդրադառնալով այս հայտարարությանը, ասաց՝ անլուրջ է և չի կարծում, թե դա պաշտոնական դիրքորոշում է, բացի այդ, «Նոր Հայաստանի» անդամ «Ժառանգությունն» ինքն էլ չի մերժում գալիք ընտրություններին կուսակցության մասնակցությունը:
Անդրիաս Ղուկասյանն իր հերթին հայտարարեց՝ Դավիթ Հովհաննիսյանն անձնական տեսակետ է ներկայացրել, սակայն ընտրությունների հե կապված հայտնած տեսակետը կիսում է:
