«Առաջին լրատվական»-ի զրուցակիցն է ֆինանսների նորանշանակ նախարար Դավիթ Սարգսյանը:
Ֆինանսների նորանշանակ նախարար Դավիթ Սարգսյանը «կոռեկտ չի համարում» անդրադառնալ ռուսական գազի գնի թանկացման հնարավոր հետևանքներին մեր բյուջեի վրա, այն բանից հետո, երբ գազի գնի մասին խոսել է վարչապետը: Հիշեցնենք, որ Դավիթ Սարգսյանը կառավարության աշխատակազմի ղեկավարն էր և ոչ վաղ անցյալում ՀՀԿ-ական դարձավ:
– Պարոն Սարգսյան, Դուք բավական երիտասարդ եք, կարծում եք` Ձեր փորձառությունը կբավարարի՞ նախարար աշխատելու, այն էլ այս իրավիճակում, ուր թևակոխում է երկիրը` գազի գնով պայմանավորված սպասվող թանկացումների և այլնի հետ կապված:
– Դուք կարծում եք, որ չի՞ բավարարի: …Ինչո՞ւ կամ ո՞ւմ համեմատ եմ երիտասարդ:
– Հնարավո՞ր է` Դուք պարզապես լինելու եք կատարող նախարար, ուղղակի վարչապետի որոշումներն եք կատարելու:
– Առաջինը` իսկ դրանում ինչ-որ վատ բան կա՞, երկրորդը` ցանկացած նախարար աշխատում է առաջնորդվելով կառավարության ծրագրով, նախագահի և վարչապետի հանձնարարականներով: Ցանկացած նախարար աշխատում է` հիմք ընդունելով այն կառավարության ծրագիրը, որը հաստատում է ԱԺ-ն, որի քննարկմանն ենք մենք այսօր մասնակցում:
– Պարոն նախարար, ԱԺ-ում խոսվում է գազի գնի թանկացման և դրան հետևող հնարավոր թանկացումների մասին…
– Ես կարծում եմ` բոլոր էդ հարցերի պատասխանը վարչապետը տվեց:
– Կուզենայի Ձեր կարծիքն իմանալ, թե ի՞նչ վայրիվերումներ են մեզ սպասվում ֆինանսական ոլորտում:
– Ես կարծում եմ, որ գազի գնի հետ կապված բոլոր հարցերին այսօր հանրապետության վարչապետը պատասխանեց ԱԺ պատգամավորների համար:
– Ասել է թե` Դուք ասելիք չունե՞ք:
– Այս պահին ես կարծում եմ, որ դա կոռեկտ չի լինի:
– Պարոն Սարգսյան, Դուք Ձեր կարիերայի որոշակի փուլում որոշեցիք, որ պետք է հանրապետական դառնաք: Ասել է թե` դեռ այն ժամանակ նախապատրաստվում էիք, որ հնարավոր է նախարա՞ր դառնաք:
– Ճիշտն ասած` կուսակցությանն անդամագրվելը ես չեմ կարծում, որ որևէ կապ ունի այս կամ այն նշանակումների հետ` կոնկրետ իմ պարագայում: Ես կուսակցությանն անդամագրվել եմ, որովհետև կիսել եմ կուսակցության գաղափարախոսությունը: Բավական երկար համագործակցություն եմ ունեցել կուսակցության հետ և ինչ-որ պահի դարձել եմ նաև կուսակցության անդամ:
– Սակայն Դուք փաստորեն ՀՀԿ գաղափարախոսությունը կիսեցիք այն ժամանակ, երբ պաշտոն ունեցաք կառավարությունում, դարձաք աշխատակազմի ղեկավար:
– Ոչ, մինչև էդ բավական երկար ժամանակ ես համագործակցել եմ ՀՀԿ-ի հետ:
Լուսանկարը՝ PanARMENIAN Photo-ի