ԱՄՆ նախագահ Բարաք Օբաման առաջիկա հինգշաբթի ծրագրային ելույթ կունենա, որում կներկայացնի ահաբեկչության դեմ պայքարի նոր ռազմավարություն և կընդգծի դրա իրավական շրջանակները:
Նախագահը կներկայացնի իրենց աշխատանքը՝ ուղղված Գուանտանամոյի հատուկ բանտի փակմանը, որտեղ պահվում են ահաբեկիչներ և նրանց աջակցություն ցուցաբերելու մեջ կասկածվող անձինք:
Ինչպես հայտնում է Washington Post-ը՝ հղում անելով Սպիտակ տան ներկայացուցչին, ամերիկյան առաջնորդի առանցքային ելույթը տեղի կունենա Ազգային պաշտպանության համալսարանում, որը գտնվում է Ֆորտ Մաքնեյր ռազմաբազայում:
Իր ելույթում Օբաման կանդրադառնա նաև արտերկրում ծայրահեղականների դեմ անօդաչու թռչող սարքերի կիրառմանն առնչվող հարցերին, կխոսի «Ալ-Քաիդա» ցանցի և դրա հետ կապ ունեցող խմբավորումների դեմ ուղղված ապագա աշխատանքի մասին:
