ԱՄՆ-ում խոշոր տեղեկատվական գործակալությունը՝ Associated Press-ը, չի բացառում, որ դատի կտա ԱՄՆ արդարադատության նախարարությանը: Դա կիրակի օրը հաստատել է AP-ի նախագահ Հերի Փրյուիթը: Պատճառը արդարադատության նախարարության կողմից գործակալության հեռախոսազանգերի վերաբերյալ գաղտնի տեղեկությունների հավաքումն էր, ինչը մեծ աղմուկ բարձրացրեց:
Կիրակի օրը ելույթ ունենալով CBS հեռուստաալիքի եթերում՝ Փրյուիթն այդ գործողությունները համարել է ԱՄՆ Սահմանադրության և նրա առաջին ուղղման խախտում, համաձայն որի՝ պետք է պահպանվի մամուլի ազատությունը:
«Ես չգիտեմ՝ որն է նման գործողությունների մոտիվացիան, սակայն կարող եմ ասել, որ նրանց գործողությունները հակասահմանադրական են»,-ասել է նա: Փրյուիթն ասել է նաև, որ ինքը և իր գործընկերները «կասկածի տակ չեն դնում ԱՄՆ իշխանությունների՝ նման հետաքննություն անցկացնելու իրավունքը: Այնուամենայնիվ, մենք կարծում ենք, որ տվյալ դեպքում նրանք սխալ ճանապարհով են գնացել»,- ընդգծել է Փրյուիթը:
Նրա խոսքով՝ այդ իրավիճակում ԱՄՆ իշխանությունների ձեռնարկած գործողությունները բացասաբար են ազդել AP-ի՝ այն աղբյուրների հետ աշխատանքի վրա, որոնք ցանկանում էին գաղտնի մնալ:
«Իրականում մենք արդեն տեսնում ենք դրա հետևանքները: Պաշտոնական անձինք, ովքեր մեզ հետ լավ հարաբերությունների մեջ են եղել, այժմ ասում են, որ այնքան էլ չեն ցանկանում մեզ հետ շփվել: Այսպիսով, մենք արդեն բախվել ենք դրա հետ: Եվ դա զուտ ենթադրություն չէ»,- ասել է Փրյուիթը:
