ԱՄՆ-ում այսօրվանից կրկին սկսել է գործել պետպարտքի վերին թույլատրելի շեմի մասին օրենքը, որի գործողությունը Կոնգրեսի կողմից այս տարի կասեցվել էր: Պետպարտքի «առաստաղը» վերականգնվել է նոր մակարդակի վրա՝ մոտ 16.7 տրիլիոն դոլար՝ հաշվի առնելով վերջին ամիսներին երկրի իշխանությունների վերցրած փոխառնությունները: Այս մասին հայտնում է ITAR-TASS-ը:
Ինչպես վստահեցրել է ԱՄՆ ֆինանսների նախարար Ջեյքոբ Լյուն, դաշնային կառավարությունում պարտքի սպասարկման հետ կապված խնդիր մինչև սեպտեմբեր չի սպասվում:
Հունվարին Կոնգրեսը մինչև մայիսի 18-ը դադարեցրել էր երկրի պետպարտքի վերին թույլատրելի շեմի մասին օրենքի գործողությունը, որը հաստատված էր 16.4 տրիլիոն դոլար:
Մի քանի ամիս կառավարությունը կարող է գոյատևել առանց նոր վարկերի՝ ներքին ռեսուրսների օգտագործման հաշվին: Մասնավորապես, վերջերս ԱՄՆ հիփոթեքային վարկավորման գործակալությունը հայտարարել է, որ եռամսյակային ռեկորդային շահույթ է ստացել և գանձարան կվերադարձնի 59.4 միլիարդ դոլար: 2008-ի ֆինանսական ճգնաժամի ժամանակ ԱՄՆ իշխանություններն այդ կառույցը փրկել էին սնանկացումից, և այժմ այն վերադարձնում է պարտքերը:
