Գազի գնի պահպանմանն ուղղված Վրաստանի որդեգրած մոտեցումները կիրառելի չեն Հայաստանում: Այս մասին այսօր «Առաջին լրատվական»-ի հետ զրույցում ասաց վրացի քաղաքագետ, Կալանավայրերի և իրավական օգնության նախկին նախարար Խաթունա Կալմախելիձեն՝ անդրադառնալով հարցին, թե ինչպե՞ս է Վրաստանին հաջողվում պահպանել Ադրբեջանից ստացվող գազի սակագինը, և այդ մեթոդները կարո՞ղ են արդյոք կիրառելի լինել Հայաստանում:
Խաթունա Կալմախելիձեի խոսքով՝ հաշվի առնելով այն հանգամանքը, որ Վրաստանը գազը ստանում է Ադրբեջանից, իսկ Հայաստանը՝ Ռուսաստանից, գազի գինը պահպանելուն ուղղված Վրաստանի որդեգրած մոտեցումները կիրառելի չեն կարող լինել Հայաստանում: Ըստ նրա՝ պատճառը նաև այն է, որ Ռուսաստանի հարաբերությունները՝ Հայաստանի և Ռուսաստանի հարաբերությունները Վրաստանի հետ լրիվ այլ հարթություններում են, էապես տարբերվում են իրարից:
«Այս պահին Վրաստանն օգտագործում է միայն ադրբեջանական գազ, և այն ստանում է բավականին մատչելի պայմաններով, քանի որ Վրաստանով է անցնում ադրբեջանական գազը, այդ թվում՝ միջին ասիականը, ուստի շնորհիվ սրա մենք ստանում ենք ավելի էժան գազ՝ համաշխարհային գների համեմատ: Մենք ռուսական գազ չենք օգտագործում ընդհանրապես, մեզ մոտ գործում այլ գնացուցակ է՝ այլ երկրներից տարբերվող: Ի դեպ, նշեմ, որ դա կախված է նաև նրանից, թե մենք այդ գազը ստանում ենք տրանզիտայի՞ն տարբերակով, թե՞ անմիջապես Ադրբեջանից»,- նշեց նա:
Հիշեցնենք, որ Հանրային ծառայությունները կարգավորող հանձնաժողով «ՀայՌուսգազարդի» ներկայացրած հայտում որպես նոր գին (մինչև 10 հազ. խ/մ գազ սպառողների համար) ֆիքսված է 221 000 դրամ` յուրաքանչյուր 1000 խ/մ-ի դիմաց (կամ 221 դրամ` 1 խ/մ-ի դիմաց), այսինքն` թանկացումը մոտ 67% է: Իսկ ՀՀ կառավարության նիստի ժամանակ վարչապետ Տիգրան Սարգսյանը հայտարարեց, որ գազի թանկացման 30 տոկոսը կառավարությունը վերցնելու է իր վրա: