Հայաստանը ԱՄՆ նախագահի թեկնածուներից ակնկալիքներ չպետք է ունենա. ո՞ւմ վրա «խաղադրույք» դնեն ամերիկահայերը

2016 թվականի նոյեմբերի 8-ին Ամերիկայի Միացյալ Նահանգների քաղաքացիներն ընտրելու են 45-րդ նախագահին։ Նախագահն իր պաշտոնավարումը կսկսի արդեն հաջորդ տարի՝ հունվարի 20-ից։

Առաջատար թեկնածուներից հանրապետական միլիարդատեր Դոնալդ Թրամփը հայտնի է աղմկահարույց հայտարարություններով: Թրամփն առաջարկում է պատ կառուցել Մեքսիկայի հետ սահմանին, երկիր թողնել միայն քրիստոնյա միգրանտներին: Անգամ ԱՄՆ ներկայիս նախագահ Օբաման կոչ է արել ամերիկացիներին չքվեարկել Թրամփի օգտին: «Հուսով եմ՝ մարդիկ հասկանում են, որ նախագահ լինելը լուրջ գործ է, ոչ թե ռեալիթի շոուի կազմակերպում կամ մարկետինգ: Ուստի շարունակում եմ հուսալ, որ պարոն Թրամփը նախագահ չի դառնա»,- օրերս հայտարարել է Օբաման:

Նյույորքաբնակ քաղաքագետ Հայկ Մարտիրոսյանն «Առաջին լրատվական»-ի հետ զրույցում ասաց, որ նույնիսկ Միացյալ Նահանգներում այսօր քչերը գիտեն, թե Թրամփի նախագահ դառնալու դեպքում Միացյալ Նահանգներին ինչ է սպասվում, ուստի բավականին բարդ է խոսել նաև Հայաստանի և հայ-ամերիկյան հետագա հարաբերությունների մասին։

Մարտիրոսյանն այն կարծիքին է, որ ոչ միայն Հայաստանի, այլև Միացյալ Նահանգների համար նպաստավոր չի լինի, եթե նախագահ դառնա հանրապետական  Թեդ Կրուզը կամ Մարկո Ռուբիոն։

Կալիֆոռնիա Կյուրիեր թերթի խմբագիր Հարութ Սասունյանն օրերս իր «Լավ լուր ամերիկահայերի համար» հոդվածում կոչ էր արել հայերին այսուհետ ձեռնպահ մնալ նախագահի թեկնածուներին հարցնելուց, թե արդյոք ընտրվելու դեպքում նրանք կճանաչեն Հայոց ցեղասպանությունը, քանի որ նախորդ հիասթափեցնող փորձերից պետք է իմանան, որ չեն կարող վստահել թեկնածուներից շատերի տված խոստումներին:

Հայկ Մարտիրոսյանը մեզ հետ զրույցում նշեց՝ ակնկալինքեր չպետք է ունենալ, կյանքի փորձը ցույց է տալիս, որ մի քանի բացառություններից զատ ոչ մի թեկնածու Հայոց ցեղասպանությունը «Ջենոսայդ» տերմինով չի անվանել:

Քաղաքագետի դիտարկմամբ միայն մեկ թեկնածու կա, ում վրա կարելի է խաղադրույք կատարել՝ դեմոկրատ Բերնի Սանդերսը, սակայն նա էլ, լինելով ամենադրական թեկնածուն, ունի մեծ բաց կողմ։