Խաչիկ Մուրադյանը դարձել է առաջին ուսանողը, ով փիլիսոփայության դոկտորի աստիճան է ստացել Հայոց ցեղասպանության ուսումնասիրության համար՝ Կլարկի համալսարանի Հոլոքոստի և Ցեղասպանության ուսումնասիրությունների «Ստրասլեր» կենտրոնում։ Այս մասին հայտնում է telegram.com-ը։
«Ինձ համար այս աստիճանը կարևորում է ուսումնառության 6 տարիները, որոնք ինձ հանձնառություն ներշնչեցին գիտության ու դասավանդման հանդեպ, որը ես հիմա կփոխանցեմ իմ ուսանողներին»,- ասել է Մուրադյանը։
Մուրադյանը պաշտպանեց իր թեկնածուական ատենախոսությունը՝ «Ցեղասպանությունն Օսմանյան Թուրքիայում և մարդասիրական աջակցությունը Սիրիայում (1915-1917)», պրոֆեսորներ Թաներ Աքչամի (ծագումով թուրք առաջին գիտնականը, ով ճանաչել է Հայոց ցեղասպանությունը) և Դեբորա Դվորքի առջև, ովքեր եղել են ատենախոսության հանձնաժողովի համանախագահներ։ Ռեյմոնդ Գևորգյանը՝ Փարիզի Նուբարյան գրադարանի տնօրենը, եղել է հանձնաժողովի երրորդ անդամ։
Աքչամի խոսքով՝ սա նշանավորում է պատմական բեկում Հայոց ցեղասպանությունների հետազոտման ոլորտում, քանի որ նա ոչ միայն Հայոց ցեղասպանության գծով առաջին դոկտորն է, այլև առաջին դոկտորը Հյուսիսային Ամերիկայում՝ դաշտում այդքան երկար տարիների լռությունից հետո։
Կենտրոնի գործադիր տնօրեն Մերի Ջեյն Ռեյնի խոսքով՝ սա աշխատանքը շարունակելու շատ կարևոր միտման սկիզբ է։ Նա նշել է, որ 4 այլ ուսանողներ դոկտորական աստիճան են պատրաստվում ստանալ Հայոց ցեղասպանության թեմայով հետազոտությունների համար։
Մուրադյանը 2007-2014թթ. եղել է Armenian Weekly-ի խմբագիրը, արժանացել բազմաթիվ մրցանակների, այդ թվում՝ Հրանտ Դինքի առաջին «Ազատության և արդարության մեդալին», որը նրան շնորհվել է 2014 թվականին Ստամբուլի հայերի կազմակերպության կողմից։
