Սիրիական ճգնաժամի հետ կապված ռուս-թուրքական լարված հարաբերությունների ֆոնին Թուրքիայում դարձյալ ակտիվացել են Ստամբուլի Սուրբ Սոֆիա քրիստոնեական տաճարը մզկիթի վերածելու շուրջ խոսակցությունները:
Սուրբ Սոֆիան մզկիթի վերածելու անհրաժեշտության մասին այս շաբաթ հրապարակումներ են հայտնվել թուրքական երկու թերթերում:
Թուրքական աջ քաղաքական ուղղվածության «Միլլի գազեթե» (Ազգային տեսակետ») թերթը, որը հանդիսանում է «Բարօրություն» իսլամական կուսակցության տեղեկատվական մարմինը, Կոնստանդնուպոլսի պատմական մասի վերակառուցման նախագծին նվիրված հոդվածում գրել է. «Սպասվում է Սուրբ Սոֆիան ազատել գերությունից և նրանում մզկիթ վերածնել»:
Իշխանամետ «Ենի Շաֆագ» թերթում հրապարակված` «Սուրբ Սոֆիայի բացումն աշխարհին» հոդվածում Լեյլա Իփեքչին գրում է, որ Թուրքիայի վրա բազմամյա ճնշումը խանգարել է կատարել «ժողովրդի պահանջը» և Սուրբ Սոֆիան վերածել մզկիթի:
Թրքուհի հոդվածագիրը գտնում է, որ այսօր «իրավիճակի և Ռուսաստանի հետ հարաբերությունների փոփոխությունը բարենպաստ իրավիճակ է ստեղծում այն բանի համար, որպեսզի Սուրբ Սոֆիան վերածել մզկիթի»:
Իփեքչին, այդուհանդերձ, «ողորմած» է գտնվում և կարծիք հայտնում, որ եթե համապատասխան խնդրագիր ներկայացվի, ապա տաճարի փոքրիկ մասը կարող է թողնվել նաև քրիստոնեական ժամերգության համար:
