«Հրապարակ»-ը գրում է. «Կորյունի 8 հասցեում գտնվող թիվ 1 մանկապարտեզը 2010 թվականից վերանորոգման նպատակով փակվեց և մինչ օրս շարունակում է փակված մնալ: Մանկապարտեզում, հակառակ քաղաքապետարանի վստահեցումներին, շինարարական որևէ աշխատանք չի տարվել: Դուռը փակ է, դարպասներն էլ` կողպված: Միայն պահակն է երբեմն գալիս և իրեն հասանելիք 45 հազար դրամի դիմաց խնամում բակի ծառերն ու կանաչ տարածությունը, թափում աղբն ու գնում: Հարևանությամբ գտնվող շենքերի բնակիչների աչքն էլ ջուր է կտրել` սպասելով, թե երբ կվերաբացվի մանկապարտեզը, որպեսզի ստիպված չլինեն վաղ առավոտյան, երեխաներին առած, վազել իրենց բակից բավական հեռու տեղակայված մանկապարտեզներ:
Միայն այն ժամանակահատվածում, երբ զրուցում էինք մանկապարտեզի պահակի հետ, մի քանի ծնող, երեխաների ձեռքը բռնած, մոտեցան մեզ, հետաքրքրվելով` կարո՞ղ է մանկապարտեզը բացվում է: Լսելով պահակի ժխտողական պատասխանը, զայրացած հեռացան: «Ինչքա՞ն կարելի է: Մեր բակի մեջ էր, երեխաները դռնից դուրս էին գալիս՝ մտնում մանկապարտեզ: Հիմա կիլոմետրեր ենք անցնում, որ երեխեքին հասցնենք մանկապարտեզ»,-դժգոհեց մի ծնող: Բնակիչներից շատերն էլ, վերը նշված պատճառով, նախընտրել են պարզապես երեխաներին մանկապարտեզ չտանելու տարբերակը:
Հիշեցնենք, որ մոտ 2.5 տարի առաջ քաղաքապետարանը, պատճառաբանելով, թե շենքը վթարային վիճակում է, տանիքում կարիճներ կան, իսկ նկուղում` առնետներ, դատարկեց մանկապարտեզը: Սաներին ու աշխատակազմին էլ, աղմուկ չլինելու համար, բավական վարպետորեն տեղավորեցին այլ մանկապարտեզներում: Շատ արագ կվերանորոգվի ու կվերաբացվի` խոստացավ քաղաքապետարանը: Բայց ինչպես այն ժամանակ, այնպես էլ հիմա քչերն են հավատում, որ հաստատությունը կվերաբացվի: «Մոռացեք, որ էդ մանկապարտեզը կբացվի»,-ի պատասխան մեր հարցերի, եղավ շենքի բնակիչներից մեկի արձագանքը: Ինչո՞ւ` հարցրինք: «Դրա վրա հազար հոգի աչք ունեն»,-եղավ պատասխանը: Խոսվում է, որ մանկապարտեզի շենքին արդեն տիրացել են: Տիրացողն էլ, որոշ տեղեկություններով, Երևանի նախկին քաղաքապետ, ներկայիս կապի և տրանսպորտի նախարար Գագիկ Բեգլարյանն է, ում օրոք էլ հենց փակվեց մանկապարտեզը: Իրենով արեց, փակեց ու անգամ չի էլ օգտագործում այդ շենքը:
Ըստ խոսակցությունների, առաջիկայում նախատեսվում է այդտեղ հյուրանոց կամ ռեստորանային համալիր կառուցել: Պահակը չցանկացավ այդ թեմայով մեր հարցերին պատասխանել: «Դե, դրանք շուտվա խոսակցություններ են: Էնքան խոսակցություններ գնաց, ես էլ եմ լսել, բայց դե ի՞նչ իմանաս»,-եղավ նրա արձագանքը: Պահակի խոսքով, այս տարվա փետրվարին քաղաքապետարանից «կամիսիա» է եկել: Եկել-նայել են, ասել են, որ գումար լինելու դեպքում կվերանորոգեն, ու գնացել են: Բայց թե երբ, ով, ինչպես` բան չեն ասել: «Շատ լավ կլիներ, որ բացվեր: Ես էլ կուզենամ, որ բացվի, աշխատանք կունենամ: Մեծ մանկապարտեզ էր, 10 խումբ կար»,-ասաց պահակը:
Քաղաքապետարանից երեկ մանկապարտեզի վերջնական ճակատագրի հետ կապված տեղեկություն ստանալ չհաջողվեց: Կրթության վարչության պետն այդպես էլ չպատասխանեց մեր զանգերին, իսկ լրատվության վարչության պետն ասաց, որ դա իր պաշտոնավարման տարիներին չի եղել, և ոչինչ չի կարող ասել, «հարցերը գրավոր ուղարկեք»՝ վերջում հերթապահ պատասխանը տվեց: Առաջիկայում, երբ Արթուր Գևորգյանին հաջողվի հայթայթել ոչ իր պաշտոնավարման տարիներին առնչվող ինֆորմացիան, կտպագրենք նաև քաղաքապետարանի պատասխանը»:
