Մոսկվա ժամանած Իրանի պաշտպանության նախարար Հուսեյն Դեhղանը կհանդիպի ՌԴ պաշտպանության նախարար Սերգեյ Շոյգուի և փոխվարչապետ Դմիտրի Ռոգոզինի հետ՝ քննարկելու ռազմական ոլորտում համագործակցությունը: Այս մասին գրում է Kommersant-ը։ Կա նաև հավանականություն, որ նախարարին կընդունի ՌԴ նախագահ Վլադիմիր Պուտինը։
Աղբյուրների տվյալներով՝ Թեհրանը ծրագրում է Մոսկվայից գնել 8 մլրդ դոլարի ռազմական տեխնիկա և սպառազինություն։ Իրանցի զինվորականների փոխանցած ցուցակն արդեն ուսումնասիրել են Կրեմլում, կառավարությունում և ՊՆ-ում։
Նախնական տվյալներով՝ Իրանն ակնկալում է, ի թիվս այլ տեխնիկայի, ձեռք բերել «Սու-30Մ» տեսակի կործանիչներ, «Յակ-130» ուսումնառազմական ինքնաթիռներ, «Մի-8» և «Մի-17» ուղղաթիռներ, «Բաստիոն» հրթիռային համալիրներ, արագընթաց հածանավեր և դիզելաէլեկտրական սուզանավեր։
Նշվում է, որ ռազմական ոլորտում համագործակցության ընդլայնմանը կարող է խանգարել 2 գործոն։ Առաջին հերթին Թեհրանը մտադիր է սպառազինություն ձեռք բերել վարկով, սակայն Մոսկվան պատրաստ չէ այդ քայլին՝ տնտեսությունում առկա ճգնաժամի պատճառով։
Բացի այդ, ՄԱԿ ԱԽ 2231 բանաձևը սահմանափակում է սպառազինության մատակարարումներն Իրան, որոնք կգործեն մինչև 2020 թվականը։
