ֆրանսահայ շանսոնյե Շառլ Ազնավուրը հարցազրույց է տվել CNN-ի Connect the World ծրագրին։
Մատնացույց անելով շանսոնյեի հաջողությունները՝ հաղորդավարը հիշեցրել է երիտասարդ տարիքում Ազնավուրին քննադատողների մասին, ովքեր նրան համարել են տգեղ, կարճահասակ, իսկ ձայնը՝ սարսափելի։ «Ի դժբախտություն քննադատների, ովքեր դա ասել են, ես հաջողություն ունեցա»,- ասել է Ազնավուրը:
Ո՞րն է Ազնավուրի հաջողության գաղտնիքը հարցին՝ Ազնավուրը պատասխանել է.«Ես ամեն գիշեր մեկ ժամ գիրք եմ կարդում, ես տարբեր լեզուներով ինչ-որ բան եմ սովորում ամեն գիշեր՝ մեկ ժամ մինչև քնելը»։
«Հիմա ես փորձում են ռուսերեն սովորել»,- ասել է Ազնավուրը՝ պատասխանելով այն հարցին, թե վերջին շրջանում ի՞նչ է սովորել:
«Բոլոր երգերն ինչ-որ բան ասում են։ Ես սիրում եմ քեզ, դու սիրում ես ինձ, դու ինձ չես սիրում, ես քեզ չեմ սիրում՝ միշտ նույն բանը։ Ի՞նչ հետաքրքիր բան կա դրանցում։ Այնքան բան կա մեր շրջապատում, որ շատ հետաքիքր է»,- ասել է Ազնավուրը՝ արձագանելով այժմեական թեմաներով երգելու վերաբերյալ հաղորդավարի դիտարկմանը։
«Ի՞նչ է նշանակում հայ լինելը Ձեզ համար»,- հարցրել է Բեքի Անդերսոնը։ «Ֆրանսիացի լինելն ինձ համար պակաս կարևոր չէ, քան հայ լինելը, բայց ես հայ եմ, չեմ պատրաստվում հերքել, գիտեք, դա սարսափելի կլինի։ Չեմ սիրում մարդկանց, ովքեր ինչ-որ բան են թաքցնում՝ վախենալով, որ չեն ընդունվի։ Չեք սիրում հայերին, ես հեռանում եմ, հաջողություն»,- ասել է նա։
Անդրադառնալով Թուրքիայի կողմից Հայոց ցեղասպանության ճանաչման խնդրին՝ Անդերսոնը հիշեցրել է, որ աշխարհահռչակ երաժիշտը 2015 թվականի ապրիլի 24-ին այցելել էր Հայաստան՝ մասնակցելու Ցեղասպանության 100-րդ տարելիցի միջոցառումներին, ինչի շրջանակում ասել էր, որ իր համար կարևոր չէ՝ «ցեղասպանություն» եզրույթը կիրառվո՞ւմ է, թե՞ ոչ, կարևորը եղածը ճանաչելն է:
Մատնացույց անելով սխալն ընդունած ֆրանսիացիներին ու գերմանացիներին՝ Ազնավուրն ասել է. «Ինչո՞ւ թուրքերը չպետք է ճանաչեն կատարվածը: Ոչ ոք թուրքերին չի հարցնում, թե ինչու են սպանել հայերին: Ի՞նչն է պատճառը, կրո՞նը… չեմ կարծում: Ես կարդացել եմ Ղուրանը՝ հասկանալու համար, թե արդյոք կա՞ դրանում որևէ բան, սակայն չկար, հետևաբար կրոնը պատճառ լինել չէր կարող»,- ասել է Ազնավուրը: